सङ्खुवासभा,जेठ २२ । सङ्खुवासभाको भोटखोला गाउँपालिका २ मा भालुको आक्रमणबाट एक महिला घाइते भएकी छिन् । भोटेखोलाको गुठीगुम्बाकी योङजुङ भोटे भालुको आक्रमणबाट घाइते भएकी हुन ।
आज आइतवार बिहान गाउँ नजिकैको जङ्गलमा उनलाई भालुले आक्रमण गरेको हो । हिजो शनिवार बेलुकीदेखि हराएको गोरु खोज्न जङ्गल गएको बेला भोटेलाई भालुले आक्रमण गरेको हो ।
घाइते भोटेको टाउको र शरीरको विभिन्न भागमा चोट लागेको भोटखोला गाउँपालिका अध्यक्ष वाङ्छेदर भोटेले बताए । अहिले उनको स्थानीय स्वास्थ्य चौकीमा उपचार भइरहेको अध्यक्ष भोटेको भनाइ छ ।
भालुको आक्रमणबाट भएको क्षतिपूर्तिका लागि मकालु वरुण राष्ट्रिय निकुञ्जसँग समन्वय भइरहेको गाउँपालिका अध्यक्ष भोटेले जानकारी दिनुभयो ।
प्रकाशित मिति : २०७९ जेष्ठ २२ गते आइतवार
