काठमाडौं,बैशाख २८ । भारतको अरुणाञ्चल प्रदेशमा भइरहेको साफ यु-१९ च्याम्पियनसिपमा नेपालले समूह चरणको आफ्नो पहिलो खेलमा आज श्रीलंकासँग खेल्दैछ ।
समूह बी मा रहेको नेपाल र श्रीलंकाबीचको खेल युपिस्थित गोल्डेन जुब्ली स्टेडियममा नेपाली समयअनुसार बेलुका ७:४५ बजे सुरु हुनेछ ।
नेपालले श्रीलंका विरुद्ध जित हासिल गरे एक खेल अगावै सेमिफाइनलमा स्थान पक्का गर्नेछ ।
नेपाल रहेको समूह बी को पहिलो खेलमा भारतले श्रीलंकालाई ८-० को फराकिलो अन्तरले पराजित गरिसकेको छ ।
राम थापाको कप्तानीमा रहेको नेपाल सामु श्रीलंकालाई हराएर सेमिफाइनलमा स्थान बनाउने अवसर छ ।
समूहको अन्तिम खेल नेपाल र भारतबीच मंगलबार हुनेछ । आजै समूह बी अन्तर्गत बंगलादेश र भुटानबिको खेल दिउँसो ४:१५ बजे सुरु हुनेछ ।
समूह ए को पहिलो खेलमा बंगलादेश र माल्दिभ्सले २-२ को बराबरी खेलेका थिए ।
समुह चरणको खेलपछि दुवै समूहको शीर्ष दुई टोली सेमिफाइनल पुग्नेछन् ।
साफमा यस उमेर समूहमा नेपाल र श्रीलंका हालसम्म दुई पटक खेलेकोमा नेपाल अपराजित छ । नेपालले यसअघिका दुवै खेल जितेको थियो ।
सन् २०२२ मा भएको साफ यु–२० च्याम्पियनसिपमा नेपालले श्रीलंकालाई ३–० ले पराजित गरेको थियो ।
यस्तै गत वर्ष घरेलु मैदानमै भएको साफ यू-२० च्याम्पियनसिपमै नेपालले श्रीलंकालाई १–० ले पराजित गरेको थियो ।
