तुलसीपुर, असार ८ । दाङको क्षेत्र नं. १ बाट निर्वाचित संघीय सांसद मेटमणि चौधरीको बिरुद्ध हुलाक मार्फत चेक अनादर जाहेरी पठाएका ब्यबसायी प्रहरीमा सनाखत गर्न नगएपछि मुद्दा दर्ता नै हुन सकेन ।
बरु उल्टै जाहेरीकर्ताले आइतबार हुलाक मार्फत जाहेरी फिर्ताको लागि जिल्ला प्रहरी कार्यालय दाङमा पत्राचार गरेको जिल्ला प्रहरी प्रमुख एसपी अर्जुन तिमिल्सिनाले जानकारी दिए ।
रोल्पा घर भइ पछिल्लो समय दाङको घोराहीमा बस्दै आएका निर्माण ब्यबसायी धात बुढा मगरले बुधबार ५ करोड ४० लाखको चेक अनादर सम्बन्धि जाहेरी हुलाक मार्फत जिल्ला प्रहरी कार्यालय घोराहीमा पठाएका थिए ।
मगरको नामबाट आइतबार फेरि हुलाक मार्फत त्यो उजुरी फिर्ता लिन चाहेको कुरा हुलाक मार्फत आएको एसपी तिमिल्सिनाले बताए ।
नेकपा (एकीकृत समाजबादी) का सचेतक तथा उपमहहानसचिवसमेत रहेका चौधरीका बिरुद्ध हुलाक मार्फत उजुरी पठाएका ब्यक्तिलाई प्रहरीले सनाखतका लागि बोलाउँदापनि उनी गएका थिएनन् ।
एसपी तिमिल्सिनाका अनुसार सनाखत नभइ जाहेरी दर्ता हुन सक्दैन ।
हप्ता दिन भित्र पीडित भनिएका ब्यक्ति सनाखतका लागि प्रहरी कार्यालय पुग्नु पर्छ । पीडित भनिएका मगर सनाखत गर्न प्रहरीमा आउँदै नआएको हुँदा मुद्दा दर्ता गर्न नमिलेको एसपी तिमिल्सिनाले जानकारी दिए ।
