घोराही, कार्तिक २३ ।
बंगलाचुली गाउँपालिका वडा नम्बर ८ झिंगा निवासी ३३ बर्षीया दिलमाया पुन मगरले उपचारमा सहयोग गर्न अपिल गरेकी छन् । दुबै मृगौलाले काम गर्न छोडेपछि भक्तपुरको मानव अंग प्रत्यारोपण अस्पतालमा उपचार गराइरहेकी पुनले उपचारमा सहयोग गर्न अपिल गरेकी हुन् । उपचारमा ११ लाख रुपैयाँ खर्च भएको भन्दै पुनले आर्थिक अभावमा उपचार समस्या भएको बताइन् ।
माघ महिनादेखि मृगौलाको डायलासिस गराई रहेको श्रीमान खिमानसिंह पुन मगरले जानकारी दिए । मृगौला प्रत्यारोपणका लागि १० लाख खर्च हुने भन्दै आर्थिक सहयोग गरिदिन खिमानसिंहले सबैमा अनुरोधसमेत गरेका छन् । यसैबीच नेपाल मगर संघ दाङले पाँच हजार रुपैयाँ आर्थिक सहयोग गरेको छ । संघका अध्यक्ष खलुप्रसाद पुन मगरले खिमानसिंहलाई रकम हस्तान्तरण गरेका हुन् ।
प्रकाशित मिति : २०७६ कार्तिक २३ गते शनिवार
