रुकुम,पुस २७ । रुकुम पश्चिममा भिरबाट लडेर एक युवकको मृत्यु भएको छ ।
जिल्लाको आठबिसकोट नगरपालिका– २ का २४ वर्षीय गोविन्द थापाको मृत्यु भएको हो ।
डोल्पाबाट घर फर्कने क्रममा वडा नं। २ कै जहरे खोला भन्ने ठाउँमा भिरबाट लडेर थापाको मृत्यु भएको प्रहरीले जनाएको छ ।
कामका लागि डोल्पा गएका थापा घर फर्कने क्रममा २५ गते राति १० बजेको समयमा भिरबाट खसेको जिल्ला प्रहरी कार्यालय रुकुम पश्चिमले जनाएको छ ।
थापा घटनास्थलमा मृत फेला परेको जिल्ला प्रहरी कार्यालयका सूचना अधिकारी प्रहरी निरीक्षक कपिल शाहीले जनकारी दिए ।
वडाध्यक्ष देवबहादुर ऐरीले जानकारी गराएपछि अस्थायी प्रहरी पोस्ट स्यालाखदीबाट प्रहरी सहायक निरीक्षक निलो कामी र इलाका प्रहरी कार्यालयबाट प्रहरी निरीक्षक लालबहादुर सुनारको कमान्डमा खटिएको प्रहरी टोलीले प्रारम्भिक अनुसन्धान पूरा गरेपछि शव पोस्टमार्टमका लागि जिल्ला अस्पताल सल्ले ल्याइरहेको प्रहरीले जनाएको छ ।
