दाङ,पुस १६ । दाङमा ट्रयाक्टर दुर्घटना हुँदा चालकको मृत्यु भएको छ भने सहचालक गम्भीर घाइते भएका छन् । मंगलवार बेलुका सवा ९ बजेतिर रा १ त ३२५७ नम्वरको ट्रयाक्टर दुर्घटना हुँदा चालक बबई गाउँपालिका वडा नं. ५ जौंवारी निवासी २६ बर्षीय खुमबहादुर बुढाथोकीको मृत्यु भएको छ ।
उक्त दुर्घटनामा परि सहचालक सोही गाउँपालिकाको वडा नं. २ रातामाटा निवासी २५ बर्षीय टोपबहादुर खत्री गम्भीर घाइते भएका छन् । टाउकोमा चोट रहेका खत्रीलाई राप्ती प्रादेशिक अस्पताल तुलसीपुरको प्रारम्भीक उपचार पछि थप उपचारको लागि बाँकेको कोहलपुर मेडिकल कलेजमा रिफर गरिएको छ ।
ढुंगा बोकेर रातोमाटाबाट पश्चिम तर्फ आइरहेको ट्रयाक्टर अनियन्त्रित भइ भन्डै ५ सय मिटर तल खसेको थियो ।
गम्भीर घाइते चालक बुढाथोकीको तुलसीपुरस्थित राप्ती प्रादेशिक अस्पतालमा उपचारका क्रममा राति पौने १९ बजेतिर मृत्यु भएको जिल्ला प्रहरी कार्यालय दाङले जानकारी दिएको छ ।
