कञ्चनपुर,मंसिर २८ । कञ्चनपुरको महेन्द्रनगर संविधान चोक क्षेत्रमा एकसाता निषेधाज्ञा जारी गरेको छ। जिल्ला प्रशासन कार्यालय कञ्चनपुरले भीमदत्त नगरपालिका-४ महेन्द्रनगर संविधान चोक क्षेत्रमा सातदिनसम्म निषेधाज्ञा जारी गरेको हो।
बिहीबार राप्रपाले संविधान चोक क्षेत्रमा पूर्वराजा महेन्द्रको शालिक पुर्नस्थापना गर्ने तयारी अघि बढाइरहेका बेला त्यसको विभिन्न ८ राजनीतिक दलले विरोध गरेपछि स्थानीय प्रशासनले शान्ति सुरक्षा कडा पार्नका लागि सात दिनसम्म निषेधाज्ञा जारी गरेको छ।
बिहीबार कञ्चनपुरका प्रमुख जिल्ला अधिकारी गोपालकुमार अधिकारीले स्थानीय प्रशासन ऐन ०२८अनुसार २८ मंसिरदेखि सातदिनसम्म निषेधाज्ञा जारी गरिएको छ।
संविधान चोक क्षेत्रमा सालिक स्थापना गर्न दिनेरनदिने विषयमा राजनीतिक दलहरुबीच मतभिन्नता आएको सन्दर्भमा सार्वजनिक शान्ति सुरक्षालाई कायम राख्न तथा अत्याश्यक सेवालाई सञ्चालन गर्न जिल्ला सुरक्षा समितिको सिफारिसमा स्थानीय प्रशासन ऐन ०२८को दफा ६९३० बमोजिम २८मंसिरदेखि ४ पुषसम्म उक्त क्षेत्रमा पाँचजना भन्दा बढी भेला भई जुलुस, प्रर्दशन, धर्ना, घेराउ, आमसभा जस्त आन्दोलन र विरोधका कार्यक्रम गर्न निषेध गरिएको छ।
बिहीबार महेन्द्रनगरमा राप्रपाको आमसभा तथा ०६२/०६३ को दोस्रो जनआन्दोलनका क्रममा तोडिएको राजा महेन्द्रको सालिक पुर्नस्थापना कार्यक्रमका लागि पार्टी अध्यक्ष राजेन्द्र लिङदेन, वरिष्ठ उपाध्यक्ष रविन्द्र मिश्र, प्रवक्ता ज्ञानेन्द्र शाहीसहित कञ्चनपुर आएका छन्।
राप्रपा कञ्चनपुरका अध्यक्ष गजेन्द्रबहादुर चन्दले इतिहास राख्नका लागि सबैले पूर्वराजाको सालिक राख्न दिनुपर्ने माग अघि सारेका छन्। तर, ८ राजनीतिक दलहरुले ०७२ मा नयाँ संविधान जारी भएपनि राप्रपासहितको सर्वदलिय बैठकबाट उक्त स्थानमा संविधान चोकसहित गणतन्त्र स्मारक राख्ने निर्णय गरेको बताएका छन्।
राप्रपाले पार्टी कार्यालयनजिकै सडकमै टेन्ट लगाएर कार्यक्रम गर्न लागेको छ। उक्त क्षेत्रमा व्यापक सुरक्षाकर्मी परिचालन गरिएको छ।
