दाङ ,असोज २० । जनता समाजवादी पार्टी (जसपा) नेपालले लुम्बिनी प्रदेशस्तरीय भेला बोलाएको छ ।
लुम्बिनी प्रदेशबाट प्रतिनिधित्व गर्ने केन्द्रीय कार्यकारिणी समिति सदस्य, केन्द्रीय समिति सदस्य, केन्द्रीय अनुशासन आयोग, केन्द्रीय लेखा परीक्षण आयोग, केन्द्रीय निर्वाचन आयोग, केन्द्रीय सल्लाहकार समिति, सङ्घीय परिषद्का सदस्यहरूलाई प्रदेशस्तरीय भेलामा बोलाइएको पार्टीका प्रचार प्रसार तथा प्रकाशन विभाग प्रमुख पूर्ण बस्नेतले जानकारी दिए ।
जसपाले ३ महिने सङ्गठन विस्तार तथा सुदृढीकरण अभियान सञ्चालन गरिरहेको छ । त्यसै सिलसिलामा दाङको लमहीमा डाकिएको भेलाले प्रदेशको साङ्गठनिक योजना तर्जुमा गर्नुका साथै लुम्बिनी प्रदेश समिति समेत पुनर्गठन गर्ने छ ।
भेलामा प्रदेश समिति, पहिचानमा आधारित राष्ट्रिय समिति, जिल्ला तथा पालिका, जनवर्गीय सङ्गठनका अगुवा कार्यकर्ताहरूको समेत उपस्थिति रहने बताइएको छ ।
