सुर्य प्रकाश बुढा मगर,फागुन, रोल्पा १४। रोल्पाको लिबाङको टुडिखेलमा बुधबार सम्पन्न भएको फाइनल खेलमा त्रिभुवन आर्मी क्लबलाई पराजित गर्दै नेपाल पुलिस क्लबले उपाधि हात पारेको छ ।
फागुन १० शनिबारदेखि सुरु भएको सनस्टार कप पुरुष राष्ट्रिय भलिबल प्रतियोगिताको उपाधि नेपाल पुलिस क्लबले हात पारेको हो । मध्याह्न १२ बजेदेखि सुरुभएको फाइनलमा नेपाल पुलिस क्लब र त्रिभुवन आर्मी क्लबबिच पाँच सेटमा खेल भएको थियोे ।
जसमा पहिलो सेट २५–१८, दोस्रो २०–२५, तेस्रो २५–१४ र चौथो सेट २५–२३ को अंक अर्थात ३-१ सेटले पुलिस क्लबले जित हासिल गरेको छ । नेपाल पुलिस क्लबले पाँच लाख राशिको पुरस्कारसँगै सनस्टार कप,मेडल हात पारेको हो ।
फाइनलमा पराजित त्रिभुवन आर्मी क्लबले दुई लाख ५० हजार रुपैयाँ ट्रफी र मेडल जितेको हो । अर्को खेल बुधबार बिहान ९ बजेदेखि सुरुभएको कोशी र लुम्बिनी प्रदेशबिच भएको थियोे । जसमा कोशी र लुम्बिनीबिच पहिलो सेट २६–२४,दोस्रो १६–२५, तेस्रो २५–१६ र चौथो २८–२६ को अंक अर्थात ३-१ सेट कोशीले हात पारेको थियोे ।
कोशी प्रदेश तेस्रो र लुम्बिनी प्रदेश चौथो भएका छन्। तेस्रो हुनेले एक लाख सहित ट्रफी र मेडल र चौथो हुनेले ५० हजार रुपैयाँ मेडल जितेकाे सनस्टार युवा क्लबका अध्यक्ष पूर्ण केसीले जानकारी दिए ।
सनस्टार युवा क्लब रोल्पाको १३औँ वार्षिकोत्सवको अवसर पारेर आयोजना गरिएको दोस्रो राष्ट्रिय पुरुष भलिबल प्रतियोगितामा दुई विभागीय टिम त्रिभुवन आर्मी क्लब,नेपाल पोलिस क्लब र चार प्रदेशका टिम कोशी प्रदेश,मधेस प्रदेश,लुम्बिनी प्रदेश,कर्णाली प्रदेश तथा आयोजक सनस्टार युवा क्लब गरी ७ टिमको सहभागी थिए
। त्यस्तै जिल्ला स्तरीय खुल्ला महिला भलिबल प्रतियोगिता समेत सम्पन्न भएको छ । महिला भलिबलको उपाधि परिवर्तन गाउँपालिकाले हात पारेको छ । सुनिलस्मृति गाउँपालिकालाई ३-० सेटले पराजित गर्दै परिवर्तनले उपाधी जितेको हो ।
परिवर्तन गाउँपालिकाले ५५ हजार रुपियाँ ट्रफी र मेडल हात परेको छ भने सुनिल स्मृतीले ३५ हजार रुपियाँ ट्रफी र मेडल हात पारेको हो । रोल्पा नगरपालिका र लुङ्ग्री गाउँपालिका तेस्रो र चौथो भएका छन् ।
तेस्रोले १५ हजार ट्रफी र मेडल तथा चौथोले १० हजार रुपियाँ मेडल हात परेको आयोजकले जानकारी गराए । जिल्ला स्तरीय खुल्ला महिला भलिबल प्रतियोगितामा रोल्पा जिल्ला भित्रका स्थानीय तह थबाङ,परिवर्तन माडी,त्रिवेणी,सुनिल स्मृति,लुङ्ग्री,सुनछहरी गाउँपालिका र रोल्पा नगरपालिका गरी आठ टिमले सहभागी जनाएका थिए ।
रोल्पाका दुई स्थानीय तह गंगादेव र रुन्टिगढी गाउँपालिकाबाट सहभागी नभएको आयोजकले जानकारी दिए ।
