दाङ, भदौ १४ । माइती जान लागेको दुई महिलाको अटो दुर्घटनामा परि मृत्यु भएको छ । थप पाँच जना घाइते भएका छन् ।
सोमबार बेलुका साढे ५ बजेतिर अटो दुर्घटना हुँदा सल्यानको कालिमाटी गाउँपालिका वडा नं. १ लक्ष्मीपुरकी ३६ बर्षीया धनीकुमारी पुन र अन्दाजी ६० बर्षीया कमलाकुमारी पुनको मृत्यु भएको छ ।
जिल्ला अस्पताल पु¥याए लगतै पुन दुई घाइतेलाई चिकित्सकले मृत घोषणा गरेका थिए ।
जिल्ला प्रहरी कार्यालय सल्यानका सूचना अधिकारी प्रहरी निरीक्षक सन्तोष खनालले घाइते हुनेमा २१ बर्षीया अमृता बबाल र उनका वर्ष ४ का छोरा कृष्ण बबाल, मृतक धनीकुमारी पुनकी छोरी ६ बर्षीया अस्मिता पुन घाइते भएका छन् ।
घाइते मध्य चालक र अर्का एक जनाको नाम खुल्न सकेको छैन । घाइतेको जिल्ला अस्पताल खलंगामा उपचार जारी छ ।
जिल्लाको कालिमाटी गाउँपालिका वडा नं. १ लक्ष्मीपुरदेखि टोटाबाज जाँदै गरेको रा १ ह २२१९ नम्बरको अटो शारदा नगरपालिका वडा नं.१० नयाँ बस्तिमा सोमबार बेलुकी साढे ५ बजेतिर दुर्घटनामा परेको हो ।
क्षमताभन्दा धेरै बढी यात्रु बोकेका कारण अटो अनियन्त्रित भएर दुर्घटनामा परेको पूर्व अनुमान गरिएको खनालले बताए ।
तीज पर्वको दर खानका लागि माइतीले बोलाएपछि माइत जाँदै गरेका महिलाहरु दुर्घटनामा परेको प्रहरीले बताएको छ । अटो सडकदेखि करिब १०० मिटर तल खसेको छ ।
उकालोमा अटो ब्याक भएका कारण दुर्घटनामा परेको प्रहरीले जानकारी दिएको छ ।
