लमही,पुस १४ । सुदुर पश्चिम प्रदेशले दाङको लमहीमा जारी प्रधानमन्त्री कप महिला राष्ट्रिय क्रिकेट प्रतियोगितामा विजयी सुरुवात गरेको छ ।समूह ‘बी’ मा रहेको सुदुर पश्चिमले प्रतियोगितामा विजयी सुरुवात गर्ने क्रममा मंगलबार दिनको पहिलो खेलमा गण्डकी प्रदेशलाई ५९ रनले पराजित गरेको छ।
खेलमा सुदुर पश्चिमले दिएको १ सय ८ रनको विजयी चुनौतीलाई पछ्याएको गण्डकी निर्धारित २० ओभर पूरै खेल्दै ६ विकेट गुमाएर ४८ रनमा सिमित हुन् पुग्दा नतिजा सुदुर पश्चिमले आफ्नो पक्षमा पार्न सफल भयो ।
ब्याटिङतर्फ गण्डकी प्रदेशका लागि कुनै ब्याटरले दोहोरो अंक जोड्न सकेनन् । उसका लागि सृष्टि पौडेलले ८ रन र ज्योत्सनिका मरासिनीले अविजित रहदै ६ रन जोडिन ।
बलिङमा सुदुर पश्चिमकी सुनिता लोहारले २ विकेट हात पार्दा कविता कुवँर, रितु कनौजिया र लक्ष्मी साउदले १÷१ विकेट लिएका थिए।
त्यसअघि देउखुरी क्रिकेट मैदानमा टस जितेर पहिले ब्याटिङ गरेको सुदुर पश्चिमले १९।३ ओभरमा आफ्नो सबै विकेट गुमाएर १ सय ७ रन बनाएको थियो ।
टिमले त्यो योगफल खडा गर्ने क्रममा ओपनर ब्याटर रेवती धामीले सर्वाधिक ठूलो पारी खेलिन । ३६ बलको सामना गरेकी उनले २ चौकासहित २७ रन बनाएकी थिइन ।
त्यस्तै रेवती बाहेक टोलीका लागि कप्तान विन्दु रावलले १३ रन , ओपनर ब्याटर मन्जु बोगटीले १० रन र रुवि पोदारले ५ रन बनाइन ।
बलिङतर्फ गण्डकी प्रदेशका लागि सृष्टि पौडेल र अलिशा लामिछानेले ३÷३ विकेट हात पारे । भने अञ्जली विश्वकर्माले पनि पनि १ विकेट लिन सफल भइन ।
त्यस्तै प्रतियोगितामा समूह ‘ए’ बाट एपीएफ र लुम्बिनी प्रदेश सेमिफाइनल पुगेका छन। एपीएफ समूह विजेता हुँदै सेमिफाइनल पुग्दा लुम्बिनी उप–विजेता बन्दै सेमिफाइनल पुगेको छ ।
प्रतियोगिता अन्तर्गत अब सेमिफाइनलमा एपीएफले समूह ‘बी’ को उप–विजेतासँग खेल्नेछ । त्यस्तै लुम्बिनीले समूह बीको विजेतासँग पुस १८ गते खेल्नेछ । प्रतियोगिताको फाइनल खेल पुस १९ गते हुनेछ ।
