सुर्खेत, बैशाख ६ । सुर्खेतको बुलबुले ताल मोटरबोट सञ्चालनका लाधि धमाधम सफा गरिँदै आइएको छ ।
मोटरबोट सेवा प्रदायक कम्पनी बोटेबोराले सुर्खेतको बीरेन्द्रनगरस्थित बुलबुले तालमा मोटरबोट सेवा संचालनको तयारी गरि रहेको छ ।
तत्कालका लागि एक करोड रुपैंया लागतमा कम्पनीले मोटरबोटको व्यवसायिक सञ्चालनको तयारी गरिएको संचालक बिष्णु ढकालले बताए।
तालमा घुम्न पुगेका पर्यटकहरूले फालेका सामान तथा जलकुम्भी लगायतका झारले ताल फोहोर बनेको थियो । वर्षौंदेखि रहेको जलकुम्भी लगायतले ढाकिएको ताललाई अहिले बोटेबोराले आफ्नै लगानीमा सरसफाइ गरिरहेको हो ।
ढकालका अनुसार, तालको सरसफाइ सकिएपछि मोटरबोट सञ्चालन गर्ने तयारी छ ।
कम्पनीले बुलबुले तालमा मोटरबोट संचालन गरे वापत बिरेन्द्रनगर नगरपालिकालाई वार्षिक १३ लाख बुझाउने सम्झौता भएको छ ।
बुलबुले तालमा कम्पनीले नेपालकै पहिलो र ठूलो मोटरबोट उत्पादक नेपाल सीप एन्ड बोट बिल्डिङले निर्माण गरेको ११ सिटे फिस्टेल मोटरबोट सञ्चालन गर्ने छ ।
यो कम्पनीले यस अघि आँबुखैरेनीको मस्र्याङ्दी जलविद्युत केन्द्रको जलाशय, नेपालगञ्जको वाटरपार्क, चितवनको नारायणघाट र देवघाट साथै सर्लाहीको भरततालमा पर्यटकहरुलाई मोटरबोट सेवा दिँदै आएको छ ।
