कैलाली,भदौ ७ । कैलालीको टिकापुरमा थरुहट र थारुवान तथा अखण्ड सुदूरपश्चिम आन्दोलनको क्रममा भएको घटनाको ७ वर्ष पूरा भएको छ । घटनामा एसएसपी लक्ष्मण न्यौपानेसहितका ७ जना प्रहरी र एक नाबालकको ज्यान गएको थियो ।
२०७२ साल भदौ ७ गते भएको घटनामा मुख्य दोषी ठहर भएका रेशम चौधरीले जन्म कैदको सजाय भोगिरहेका छन् । रेशम चौधरीको नागरिक उन्मुक्ति पार्टीले आजको दिनलाई विद्रोह दिवसका रुपमा मनाउँदैछ ।
टिकापुर घटनालाई थरुहट र थारुवान संयुक्त मोर्चाले ‘कालो दिन’ का रुपमा लिएको छ । मोर्चाले चौधरीसहितका कैदीबन्दीलाई रिहाइ गर्नुपर्ने माग राख्दै आएको छ ।
२०७२ सालमा संविधान जारी हुनु अगाडि तत्कालीन सेती र महाकाली अञ्चलका ९ जिल्ला एउटै प्रदेशमा समेटिनुपर्ने अखण्ड सुदूरपश्चिम पक्षधर र कैलाली तथा कञ्चनपुरलगायत पश्चिम तराईका बर्दिया, बाँके, दाङ, कपिलवस्तुलगायत पहाडी जिल्लाबाट अलग्गै थरुहट प्रदेशमा समावेश हुनुपर्ने लगायत माग राख्दै भएको आन्दोलनमा हिंसात्मक झडप हुँदा आठ जनाको ज्यान गएको थियो ।
हिंसात्मक घटनामा संलग्न भन्दै प्रहरीले ५८ जनाविरुद्ध कैलाली जिल्ला अदालतमा मुद्दा दर्ता गराएको थियो । तीमध्ये ३१ जना अझै फरार छन् भने २७ जनाविरुद्ध जिल्ला र दिपायल उच्च अदालतले फैसला सुनाएका छन् ।
घटनामा संलग्न नभए पनि साढे तीन वर्ष न्यायिक हिरासतमा बसेका रामनरेश चौधरी, नुरुल जागा र विश्राम कुश्मीले जिल्ला र उच्च अदालतबाट सफाइ पाएका छन् । मुख्य योजनाकारको अभियोग लागेपछि रेशम चौधरी सुरुमा फरार भएका थिए तर वारेसमार्फत उम्मेदवारी दर्ता गराएर २०७४ को प्रतिनिधि सभा चुनावमा कैलाली–१ बाट चुनाव जिते ।
जितपछि आत्मसमर्पण गरेका उनलाई जिल्ला र उच्च अदालतले जन्मकैद सुनाएको हो । चौधरीले यी फैसलाविरुद्ध सर्वोच्च अदालतमा गरेको पुनरावेदन अहिले विचाराधीन छ ।
