लमही,असोज १३ । लमही नगरपालिकाले फोहोर व्यवस्थापनका लागि चाँदनी टोल विकास समिती अमिलिया बजार व्यवस्थापन समितीलाई डस्टविन हस्तान्तरण गरेको छ ।
डस्टविन हस्तान्तरण गर्दै लमही नगरपालिकाका कार्यबाहक नगर प्रमुख लक्ष्मी योगीले गाउँ, टोल सरसफाईमा स्थानीयहरुको सक्रियता देख्दा खुशी लागेको बताइन ।
सबैले यसैगरी आआफ्नो गाउँघर सफा राख्ने तिर ध्यान दिन जरुरी छ, आज नगरे कहिले गर्ने ? हामीले नगरे कसले गर्ने ? भन्दै योगीले सरसफाईमा सक्रिय भएर लाग्न सबैलाई आग्रह गरिन ।
सरसफाईको क्रममा आवश्यक परे लमही नगरपालिका सदैब सहयोगका लागि तौआर रहेको बताइन ।
लमही नगरपालिका सरसफाई शाखाको समन्वयमा ति डस्टविन हस्तान्तरण गरिएको शाखा प्रमुख गायत्री थापाले जानकारी दिइन। अमिलिया बजारलाई सफा राख्नका लागि फोहोर संकलन गर्नका लागि डस्टविनको आवश्यकता परेको र माग भइ आएको हुँदा प्रदान गरिएको थापाले बताइन ।
दाङ र बाँकेको सिमानासंग जोडिएको अमिलिया बजारका स्थानीयहरु हरेक शनिबार बजार सरसफाई गर्दै आएका छ्न ।
कृष्ण थापाले भने”अमिलिया बजार सानो छ, फोहोर पनि त्यति धेरै त हुँदैन, तर घर पसल बाट निस्केका फोहोर हामीले जहाँ पायो त्यही फाल्न लाग्दा मानव स्वास्थ्यमै असर पर्ने देखियो ।
अब चाहिँ व्यवस्थापन तिर लाग्नु पर्छ भनेर अहिले तत्कालका लागि नजिकैको सामुदायिक वनको एक कुनामा साना साना खाडल खनेर त्यसैमा फोहोर फाल्ने गरेको उनले बताए ।
त्यसै गरि अमिलिया बजार व्यवस्थापन समितिका अध्यक्ष गणेश डाँगीले अमिलिया बजारमा खानेपानी र सार्वजनिक शौचालयको अत्यावश्यक भएकोले व्यवस्थापन गर्दिन आग्रह गरे ।
