दाङ, असोज ८ । रोल्पामा बस दुर्घटना हुँदा ६ जना घाइते भएका छन् ।
घाइते मध्य तीन जनालाई बढी चोट पटक लागेको छ । एक जनाको अवस्था गम्भीर रहेको प्रहरीले जानकारी दिएको छ ।
तीन जना घाइतेलाई राप्ती प्रादेशिक अस्पताल दाङमा पठाइएको रोल्पाका प्रहरी प्रबक्ता प्रहरी निरीक्षक देबराम भण्डारीले जानकारी दिए । रोल्पाको गंगादेब – २ की २५ बर्षीया जेसिना डाँगीको अवस्था गम्भीर रहेको छ । चालक, सहचालकको अवस्था मध्यम रहेको प्रहरी प्रबक्ता भण्डारीले बताए ।
दुर्घटनाका ६ घाइते मध्य तीन जना स्थानीय मेडिकलमै उपचार पछि घर फर्किएको प्रहरीले बताएको छ ।
दिउँसो ३ बजेर ४० मिनेटतिर प्रहरीमा दुर्घटना बारे सूचना आएको प्रहरीले बताएको छ । सडक भासिएर बस सडकदेखि दुई तीन मिटर तल खसेको प्रहरी प्रबक्ता भण्डारीले जानकारी दिए ।
बसमा कुल १५ यात्रु सवार रहेको र अन्यको वअस्था सामान्ने रहेको प्रहरीले बताएको छ ।
दाङको तुलसीपुरबाट रोल्पा तर्फ गइ रहेको रा १ ख ३००६ नम्बरको बस रोल्पाको गंगादेव गाउँपालिका – २ ओइलामको भिरघारे भन्ने स्थानमा सडक भासिएर दुर्घटनामा परेको हो ।
