तुलसीपुर, चैत ५ । दाङमा जंगली जनावर बाँदरको आक्रमण बढ्न थालेको छ । घरपालुवा कुकुर, बिरालोको तुलनामा पछिल्लो समय जंगली जनावर बाँदरको आक्रमण बढ्न थालेको हो ।
घरपालुवा तथा जंगली जनावरलाई मानिसलाई आक्रमण गर्न थालेपछि अस्पतालमा रेबिजविरुद्धको सुई लगाउन आउनेको संख्या बढ्दै गएको छ ।
राप्ती प्रादेशिक अस्पताल तुलसीपुरमा २ महिना अवधिमा कुकुर, बिरालो र बाँदरले टोेकेका ४ सय १६ जना मानिसले रेबिजविरुद्धको सुई लगाएका छन् ।
जसमा बादरले टोकेका मात्र ३६ जना रहेका छन । कुकुर २३३, विरालो ४२ जना रहेको अस्पतालले जनाएको छ ।
अस्पतालका मेडिकल सुपरिटेण्डेण्ट डा.ओम अर्यालले पछिल्लो समय बाँदरको टोकाईबाट घाइते बिरामी अस्पताल आउन थालेको बताए ।
जंगलमा खानेकुरा नपाएपछि वस्तीमा आएर मानिसलाई जंगली जनावरले आक्रमण गर्ने गरेको प्रमुख अर्यालले बताए ।
बाँदरले मानिसलाई तुलसीपुरको बजारमै टोकेको अस्पतालले जनाएको छ । बाँदरले वस्तीमै आएर आक्रमण गर्न थालेपछि स्थानीय नागरिक त्रसित भएका छन् ।