दाङ, भदौ १० । साततलेमा झरेको पहिरोका कारण दाङ– सल्यान सडक खण्ड अबरुद्ध भएको छ ।
राप्ती राजमार्ग अन्तरगत तुलसीपुर उपमहानगरपालिका वडा नं.३ साततले नजिकै शुक्रबार बिहान ८ बजेतिर झरेको पहिरो कारण सडक खण्ड अबरुद्ध भएको हो ।
पहिरो पंछाउन र अबरुद्ध सडक सूचारु गराउन डोजर पठाउने तयारी भइरहेको इलाका प्रहरी कार्यालय तुलसीपुरका प्रमुख डिएसपी पुष्पराज मल्लले जानकारी दिए । बाढीका कारण शुक्रबार बिहान तुलसीपुर – घोराही सडक खण्डपनि केही बेर अवरुद्ध भएको थियो ।
तुलसीपुर – ७ स्थित काला खोलामा आएको बाढीका कारण यातायात अबरुद्ध भएको र अहिले पानीको सतह घटेपछि सवारी साधन संचालनमा आएको डिएसपी मल्लले जानकारी दिए ।
लामो खडेरीका बीच दाङमा बर्षा भएको हो । लामो खडेरीका बीच भएको बर्षाका कारण किसान भने खुसी छन् । लामो समय पानी नपर्दा खेतको धान र मकै सुक्ने अवस्थामा पुगिसकेको थियो ।
