तुलसीपुर, साउन १६ । दाङको देउखुरीमा करेन्ट लागेर श्रीमान–श्रीमतिकोे एकै साथ मृत्यु भएको छ।
राप्ती गाउँपालिका वडा नम्बर २ का २८ वर्षीय बासु गाहा मगर र उनकी २५ वर्षीया श्रीमति हिमा गाहा मगरको करेन्ट लागेर घटनास्थलमै मृत्यु भएको छ ।
इलाका प्रहरी कार्यालय भालुवाङका प्रमुख प्रहरी निरिक्षक सुजनविक्रम शाहले सोमबार दिउँसो साढे १ बजेतिर उनीहरुको करेन्ट लागेर मृत्यु भएको जानकारी दिए ।
अब उनीहरुका तीन बर्षीय एक छोरा मात्रै बचेका छन ।
सुरुमा बासुकी भाउजु २७ वर्षीया भिमा गाहा मगरलाई कपडा सुकाउने क्रममा करेन्ट लागेको थियो ।
दुई वटा खामको बीचमा बाँधेको तारमा कपडा सुकाउन जाँदा उनलाई पोलमाथिबाट प्रवाह भएको करेन्टले छोएको थियो । त्यो देखेर देउरानी हिमा उनलाई बचाउन पुग्दा उनीपनि करेन्टको लपेटामा परेकी थिइन ।
त्यसपछि श्रीमति हिमालाई जोगाउन भनेर श्रीमान बासुले लाठीले तारमा प्रहार गर्दा त्यो तार चुडिएर उनको शरिरमा परेपछि उनको पनि करेन्ट लागेर मृत्यु भएको थियो ।
घटनास्थलको प्रकृति नियाल्दा पानी परिरहेको हुँदा पोल हुँदै टिनको पाताबाट करेन्ट प्रवाह भइ कपडा सुकाउन गएकी भिमालाई सुरुमा करेन्ट लागेको देखिएको प्रहरी निरिक्षक शाहले बताए ।
उनलाई बचाउन भनेर गएका श्रीमान–श्रीमतिको पनि एकैसाथ मृत्यु भएको छ । भिमा भने स्थानीय स्थानीय अस्पतालमा सामान्ने उपचार पछि घर फर्कि सकेकी छन ।
श्रीमान–श्रीमतिको शव पोष्टमार्टमका लागि लमही अस्पतालमा लगिएको छ ।
