दाङ, माघ २३ । राप्ती स्वास्थ्य विज्ञान प्रतिष्ठानको विवादको विषयलाई छानबिन गर्न दाङबाट प्रतिनिधित्व गर्ने सांसदहरुले माग गरेका छन् । प्रतिनिधि सभाको शिक्षा स्वास्थ्य समितिका सभापति जयपुरी घर्तीलाई ज्ञापन पत्र बुझाउँदै सांसदहरुले कर्मचारी र प्रतिष्ठान नेतृत्वको विवादका कारणबारे छानबिन गरेका हुन् ।
जिल्लाबाट प्रतिनिधित्व गर्ने प्रतिनिधि सभाका सांसद शान्ता चौधरी, रेखा शर्मा, सुजिता शाक्य, मेटमणि चौधरी, हिराचन्द्र केसी, गंगा चौधरी, विष्णु शर्मा र राष्ट्रिय सभा सदस्य कोमल वलीले ज्ञापन पत्र बुझाउँदै संसदिय समिति बनाएर छानबिन गरी समस्या समाधान गर्न आग्रह गर्नुभएको हो ।
दाङबासीको सपनाका रुपमा रहेको प्रतिष्ठान धरासायी बन्दै गएको प्रति चिन्ता व्यक्त गर्दै सांसदहरुले कर्मचारीहरुले साउन महिनादेखि तलव भत्ता नपाउनु, जागिरबाट निस्कासन हुनुको घटना दुखद् रहेको बताउनुभएको छ ।
सस्तो र भरपर्दो सेवा उपलब्ध गराउनुपर्ने भन्दै सांसदहरुले बुझाएको ज्ञापन पत्रमा प्रतिष्ठानले सेवाग्राहीको ढाड सेक्ने गरी महंगो शुल्क लिने गरेको जानकारी आएकाले उक्त कार्यलाई रोक्न माग गरिएको छ ।
