काठमाडौं, साउन २८ । सांसदहरूले कोभिड–१९ महामारीका कारण अध्ययनरत लाखौँ विद्यार्थीको भविष्य अन्योलमा परेको भन्दै सबै विद्यार्थीलाई खोप दिएर परीक्षामा सामेल हुने वातावरण बनाउन सरकारको ध्यानाकर्षण गराएका छन् ।
राष्ट्रिय सभाको आज बिहीवारको बैठकको शून्य समयमा बोल्दै सांसदहरूले कक्षा १२ को परीक्षा पूर्वतयारीविना स्थगित गरिएको र विश्व विद्यालय अन्तर्गत विभिन्न तहको परीक्षाको मुखमा रहेका विद्यार्थीले परीक्षा दिने वातावरण सिर्जना गर्न माग गरे ।
साथै उनीहरूले परीक्षार्थीलाई खोपको व्यवस्था गर्न वा वैकल्पिक विधिद्वारा परीक्षा दिने वातावरण बनाउन पनि सराकारसमक्ष माग गरे ।
सांसद उदया शर्मा पौडेलले पूर्वतयारीविना कक्षा १२ को परीक्षण स्थगित गरी झन्डै चार लाख परीक्षार्थीको भविष्य अन्योलमा परेकोमा चिन्ता व्यक्त गर्दै विद्यार्थीको मनोविज्ञानलाई असर नगर्ने गरी परीक्षार्थीलाई खोपको व्यवस्था गरी परीक्षामा सामेल हुने वातावरण बनाउन माग गरे ।
सांसद कोमल वलीले शिक्षा मन्त्री नियुक्तिमा ढिलाइ भएकाले समग्र शिक्षा क्षेत्रमा अन्योल छाएको टिप्पणी गर्दै विद्यार्थीलाई खोप लगाएर या वैकल्पिक विधिद्वारा भए पनि परीक्षा दिने वातावरण बनाउन सरकारसमक्ष माग गरिन ।
कोभिड महामारीका कारण शिक्षा क्षेत्रमा अन्योलता छाएको छ । ‘विद्यार्थीले अनलाइन माध्यमबाट अध्ययन गरे पनि परीक्षा दिन पाएका छैनन्, यसमा सरकारले विशेष ध्यान दिन जरुरी छ’, उनले भनिन ।
सांसद अनिता देवकोटाले नेपालको नक्सामा समेटिएको लिम्पयाधुरा, कालापनी, लिपुलेकको जमिन फिर्ता ल्याउन कुटनीतिक पहल गर्न सरकारलाई आग्रह गरिन ।
सांसद इन्दु कडरियाले सामाजिक सुरक्षा भत्तामा विभेद भएको तथा दलित र गैरदलितबीचको दुरी बढाएको भन्दै सामाजिक सुरक्षा भत्ता ६० वर्ष पुगेका नागरिकलाई दिने व्यवस्था गर्न माग गगरिन ।
सांसद ठगेन्द्रप्रकाश पुरीले बाढी–पहिरोले बर्सेनि प्राकृतिक विपत्तिका घटना बढेको तथा वनजङ्गल अतिक्रमण भइरहेकोमा चिन्ता प्रकट गर्दै यसको दीर्घकालीन समाधानका लागि भू–उपयोग नीतिलाई तत्काल कार्यान्वयनमा ल्याउन माग गरे ।
सांसद तारादेवी भट्टले भीमदत्त नगरपालिकाको नगर शिक्षा समितिले दरबन्दी मिलानको नाममा नियम विपरफत शिक्षकको सरुवा गर्ने गरेकोमा आपत्ति जनाउँदै यस किसिमका कार्य तत्काल बन्द गर्न माग गरिन ।
