दाङ, जेठ १४ ।भेरी अस्पतालका स्वास्थ्यकर्मीमाथि कुटपिट गर्नेहरु विरूद्ध ज्यान मार्ने उद्योगमा मुद्दा दर्ता भएको छ।
जिल्ला प्रहरी प्रमुख एसपी ओमबहादुर रानाले शुक्रबार जिल्ला प्रहरी कार्यालय बाँकेमा डाक्टर र नर्सहरुमा माथि कुटपिट गर्नेहरू विरूद्ध ज्यान मार्ने उद्योगमा मुद्दा दर्ता भएको जानकारी दिए ।
प्रहरीले नेकपा एमाले लुम्बिनी प्रदेश कमिटी सदस्य मानबहादुर रावत, भरत रावत र लोकराज रावतलाई डाक्टर र नर्सहरुमाथि कुटपिट गरेको अभियोगमा बिहीबार राति नै पक्राउ गरेको थियो ।
‘ अस्पताल भित्र पसेर डाक्टर र नर्स कुट्नेहरुलाई प्रहरीले राति नै पक्राउ गरेको थियो,’ एसपी रानाले भने ‘ कुटपिट गर्नेहरू तीनै जनाविरूद्ध ज्यानमार्ने उद्योगको मुद्दा दर्ता भएको छ ।’
उनीहरूका विरूद्ध भेरी अस्पताल प्रशासन तथा पीडित डाक्टर नर्स लगायतले जाहेरी दिएको हुँदा त्यसैको आधारमा ज्यान मार्ने उद्योगमा मुद्दा दर्ता गरिएको एसपी रानाले जानकारी दिए ।
दाङको तुलसीपुर उपमहानगरपालिका वडा नम्बर ११ उरहरीका ५२ वर्षीय डिल्लीबहादुर रावतको मृत्यु भएपछि उनका भाइ मानबहादुर रावत र छोराहरू भरत रावतलगायतले अस्पतालका डाक्टर तथा नर्समाथि आक्रमण गरेका थिए।
मृतक रावत कोरोना संक्रमन पुष्टि भएपछि जेठ ४ गते भेरी अस्पतालमा भर्ना भएका थिए ।
उपचार रावतको स्वास्थ्यमा खराबी आएपछि बिहीबार बेलुकी ८ बजेतिर मृत्यु भएको थियो।
उनको मृत्यु भए लगतै केही मानिसहरु अस्पताल प्रवेश गरि डाक्टर तथा नर्समाथि आक्रमण र अस्पताल तोडफोड गरेका थिए।
जसको तौतर्फी आलोचना भएको छ ।
राष्ट्रपति बिद्यादेबी भण्डारी, नेपाली काँग्रेसका सभापति शेरबहादुर देउवा, नेकपा माओबादी केन्द्रका अध्यक्ष पुष्पकमल दाहाल (प्रचण्ड), लुम्बिनी प्रदेशका मुख्यमन्त्री शंकर पोखरले लगाएतले आफन्तको मृत्यु पछि अस्पतालमा डाक्टर र नर्सहरुमाथि कुटपिट गर्नु जघन्य अपराध भएको भन्दै दोषीमाथि कारबाही गर्न माग गरेका छन् ।
घटनाको अनुसन्धान गर्न बाँके जिल्ला प्रशासन कार्यालयका सहायक प्रमुख जिल्ला अधिकारीको संयोजकत्वमा ७ सदस्यीय छानविन समिति समेत गठन भएको छ।
