धनगढी, माघ १८। कैलालीमा ट्याक्टर र मोटरसाइकल आपसमा ठोक्किएर दुर्घटना हुँदा दुइ जनाको मृत्यु भएको छ। शनिबार राति ११ बजे घोडाघोडी नगरपालिका १० पहलमानपुरमा पूर्व–पश्चिम राजमार्गमा ट्याक्टर र मोटरसाइकल आपसमा ठोक्किएर दुर्घटना भएको हो ।
राजमार्गमा पश्चिमबाट पूर्व गइरहेको म १ त ५४२ नम्बरको ट्याक्टर र सोही दिशातर्फ गइरहेको ब ९१ प ४०४ नम्बरको मोटरसाइकल आपसमा ठोक्किदा २ जनाको मृत्यु भएको हो। उक्त दुर्घटनामा मृत्यु हुनेमा घोडाघोडी नगरपालिका १० का २३ वर्षीय गोविन्द बुढा र १८ वर्षिय मानबहादुर बुढा रहेका छन्।
दुर्घटनापछि गम्भीर घाइते भएका उनीहरुको स्थानीय घोडाघोडी अस्पतालमा उपचारको क्रममा मृत्यु भएको जिल्ला प्रहरी कार्यालय कैलालीले जनाएको छ । ट्याक्टर चालक घोडाघोडी नगरपालिका ५ का २१ वर्षिय रामसिंह चौधरी प्रहरीको नियन्त्रणमा छन् ।
प्रकाशित मिति : २०७७ माघ १८ गते आइतवार
