काठमाडौँ,मंसिर २३ । सगरमाथाको नयाँ उचाइ ८८४८।८६ मिटर कायम भएको छ ।
मंलबार नेपाल र चीन बीचको संयुक्त बैठकले सगरमाथाको नयाँ उचाइ घोषणा गरेको हो ।
नेपालले आफ्नै साधन, स्रोत र जनशक्ति प्रयोग गरी पहिलो पटक मापन गरिएको सगरमाथाको नयाँ उचाइ सार्वजनिक गरिएको हो ।
दुई वर्ष अघिदेखिको सर्वेक्षणबाट प्राप्त विवरणहरु, चीनका समकक्षी प्राविधिक तथा निर्देशक समिति तहमा छलफल भइ सगरमाथाको नयाँ उचाइ सार्वजनिक गरिएको नापी विभागले जनाएको छ ।
चीनका राष्ट्रपति सी चिनफिङ गएको वर्ष नेपाल भ्रमणमा आएको बेला सगरमाथाको उचाइ संयुक्त रूपमा घोषणा गर्ने सहमति भएको थियो ।
दुवै देशमा एकै पटक सगरमाथाको उचाइ सार्वजनिक गरिने छ । आधुनिक तथा परम्परागत दुवै विधि अवलम्बन गरी सगरमाथाको उचाइ मापन गरिएको हो ।
यसअघि भारतले सन १९५४ मा सगरमाथाको उचाई मापन गरेको थियो । त्यतिबेलाको मापनमा प्राप्त उचाई ८ हजार ८ सय ४८ मिटरलाई नेपालले मान्यता दिएको छ ।
त्यसपछि सन १९९९ मा अमेरिकाले र सन २००५ मा चीनले सगरमाथाको उचाई मापन गरेका थिए ।
अमेरिकाको मापनमा ८ हजार ८ सय ५० मिटर उचाई थियो भने चीनले गरेको मापनमा ८ हजार ८ सय ४४ मिटर थियो ।
चीनले गरेको मापनमा हिउँलाई घटाएर चट्टान भागको मात्र उचाइ लिइएको थियो । यसपटक हिउँ सतहसहित सगरमाथाको मापन गरिएको नापी विभागले जनाएको छ ।
