बुटवल, मंसिर ११ । भैरहवामा ट्रकको ठक्करबाट बाबुछोराको मृत्यु भएको छ। सिद्धार्थ राजमार्गअन्तर्गत भैरहवाको बर्मेली चोकमा शनिबार दिउँसो ट्रकले मोटरसाइकललाई ठक्कर दिँदा स्याङ्जा निवासी बाबु छोराको मृत्यु भएको छ ।
स्याङ्जाको चापाकोट नगरपालिका वडा नं. ४ का ५३ वर्षीय गितानाथ खनाल र उनका १३ वर्षीय छोरा सुदीपको मृत्यु भएको प्रहरीले जानकारी दिएको छ ।
बुटवलबाट बेलहियातर्फ जाँदै गरेको ना ३ ख ३८६० नम्बरको ट्रकले खनाल सवार ग ११ प ५४४४ नम्बरको मोटरसाइकललाई ठक्कर दिँदा बाबु छोरा गम्भीर घाइते भएका थिए ।
घाइते बाबु छोराको उपचारका क्रममा भैरहवास्थित युनिभर्सल कलेज अफ मेडिकल साइन्सेजमा मृत्यु भएको प्रहरीले जनाएको छ । ट्रक र चालक प्रहरी नियन्त्रणमा रहेका छन् ।
प्रकाशित मिति : २०७८ मङ्सिर ११ गते शनिवार
