तुलसीपुर,असोज २६ । जिल्लामा खसी–बोका खरिदका लागि मूल्य निर्धारण गरिएको छ । खाद्य व्यवस्था तथा व्यापार कम्पनीले खरिद गरेर काठमाडौं पठाउनका लागि मूल्य निर्धारण गरिएको हो ।
प्रमुख जिल्ला अधिकारीको नेतृत्वमा रहने समितिले मुल्य निर्धारण गर्ने गर्दछ । बुधवार बसेको बैठकले मूल्य निर्धारण गरेको खाद्य व्यवस्था तथा व्यापार कम्पनी लिमिटेड शाखा कार्यालय तुलसीपुरका प्रमुख तिलक सुनारले बताए । उनका अनुसार जिउँदो खसी २५ केजीभन्दा माथिका प्रतिकेजी ५ सय ६२ रुपैयाँ तोकिएको छ ।
यस्तै खसी २० देखि २५ केजीसम्मको प्रतिकेजी ५ सय ४५ रुपैयाँ निर्धारण गरिएको छ । बोका १८ केजी भन्दामाथि प्रतिकेजी ५ सय ४२ रुपैयाँ निर्धारण गरिएको प्रमुख सुनारले बताए ।
मूल्य निर्धारणसँगै खसी, बोका खरिद गर्न सुरु गरिने समेत उनले बताए । मूल्य निर्धारण हुन नसक्दा खरिदको काम समेत अगाडि बढ्न सकेको थिएन् । सबै क्षेत्रबाट मूल्य ल्याएर समितिले मूल्य निर्धारण गरेको उनको भनाइ छ ।
व्यापार कम्पनीले असोज २८ गतेदेखि कार्तिक २ गतेसम्म खसी–बोका खरिद गरेर काठमाडौं पठाउने भएको छ ।
ढुवानीका लागि सूचना आह्वान गरिसकिएको प्रमुख सुनारले बताए । केही दिनमा त्यसको पनि टुङ्गो लाग्ने उनले बताए । ‘खसी–बोका खरिदका लागि आवश्यक सबै प्रक्रिया पूरा भएका छन्’, उनले भने । खाद्य व्यापार कम्पनीले यस वर्ष ७ सय खसी–बोका काठमाडौं लैजाने भएको छ । खसी–बोका बिक्रीका लागि कृषक सम्पर्कमा आइसकेको पनि उनले बताए ।
सम्पर्कमा आएकासँग नपुग्ने भएमा तुलसीपुर उपमहानगरपालिका, दंगीशरण, शान्तिनगर, बबई गाउँपालिका र देउखुरी भेगबाट खरिद गरिने प्रमुख सुनारले बताए ।
हरेक वर्ष खाद्य व्यापार कम्पनीले जिल्लाबाट खसी–बोका खरिद गरेर काठमाडौं पठाउने गर्दछ । यसले बाख्रापालक कृषकलाई समेत सहज हुने गरेको छ ।
