तुलसीपुर , भदौ २६ । दाङको बंगलाचुली गाउँपालिकामा एक किशोरीमाथि सामुहिक बलात्कार गरेको आरोपमा तीन जना पक्राउ परेका छन् ।
पक्राउ पर्नेमा बंगलाचुली गाउँपालिका वडा नं. ७ बिर्खेका २७ वर्षीय पवन रोका, २७ वर्षीय विनाराम मर्साङी र २० वर्षीय यमबहादुर मास्की रहेको जिल्ला प्रहरी प्रबक्ता डिएसपी मुकुन्द्र प्रशाद रिजालले जानकारी दिए ।
स्थानीय एक १७ बर्षीया किशोरीलाई यी तीन जना मिलेर राति जंगलमा सामुहिक बलात्कार गरेको उजुरीका आधारमा तीन जनालाई पक्राउ गरि आवश्यक कानुनी कारबाही सुरु गरेको डिएसपी रिजालले बताए ।
बुधबार गाउँमा साँझ तीजको नाच हेर्न गएकी ती किशोरी बिहीबार बिहान २ बजेतिर नाच हेरेर एक्लै एक्लाबर नजिक जंगलको बाटो हुँदै घर फर्किने क्रममा सामुहिक बलात्कारमा परेको पीडितले जाहेरीमा उल्लेख गरेकी छन् ।
बिहीबार मात्रै प्रहरीले घटनाबारे जानकारी पाएको र सोही दिन उनीहरुलाई पक्राउ गरिएको डिएसपी रिजालले जानकारी दिए ।
पीडित किशोरी प्रहरीको महिला सेलमा राखेर मनोपरामर्ष तथा उपचार भइरहेको प्रहरीले जनाएको छ ।
पीडितको उजुरीको आधारमा आरोपित ब्यक्रिहरुका बिरुद्ध कनुनी कारबाहीको प्रक्रिया अगाडि बढी सकेको डिएसपी रिजालले जानकारी दिए ।
