दाङ,बैशाख १५ । गीतकार खिम केसीको तेस्रो गीत ‘आमा’ शुक्रबारदेखि बजारमा आउने भएको छ । ‘लाटोकोसेरो फिल्म्स’को प्रस्तुति रहेको उक्त गीतमा सनुप पौडेलले स्वर दिएका छन् भने राजन इसानले संगीत भरेका छन् ।
आमाको मुख हेर्ने दिनभन्दा एक दिनअगाडि रिलिज गर्न लागिएको हो । आमा-छोरा एक-अर्काबाट टाढा रहँदा छोराले मनमा चल्ने हुन्डरीको वरपर यो गीत केन्द्रित छ ।
शब्द मार्फत आफ्नी आमालाई विशेष दिनको कोसेली दिन खोजेका गीतकार केसीले बताए ।
यो गीतको म्युजिक भिडियोमा रेणु नेपाल, मनीष पौडेल र शाश्वत भण्डारीले अभिनय गरेका छन् ।
भिडियो सम्पादन/निर्देशन बिजेस राजन र छायांकन नीरज श्रेष्ठले गरेका छन् । ‘एसियन म्युजिक कम्पनी’ले गीत बजारमा ल्याउँदै छ।
अहिले अमेरिकाको क्यालिफोर्नियालाई कर्मथलो बनाएर बसिरहेका केसी साहित्यमा र संगीतमा रुचि राख्छन् ।
नेपाल रहँदा केसीले झन्डै एक दशक कर्णाली र सुदूरपश्चिमका जिल्लामा सामाजिक अभियन्ताका रूपमा बिताएका छन् ।
मानवशास्त्रमा स्नातकोत्तर केसी गजल लेखनमा पनि सक्रिय छन् । उनका साहित्यिक रचना विभिन्न अनलाइन र पत्रपत्रिकामा प्रकाशित छन् ।
यसअघि केसीको ‘लुकाएको मेरो माया’ र ‘म जहिले’ गीत आइसकेका छन् ।
