काठमाडौं,बैशाख ५ । नयाँ वर्ष २०८२ को सुरुवातसँगै सेयर बजारमा सकारात्मक संकेत देखिएको छ।
साता अवधिमा नेप्से परिसूचक १.९४ प्रतिशतले वृद्धि भई २७२२ अंकमा पुगेको छ, जुन अघिल्लो साता २६७० अंकमा थियो।
गत साता बजारमा केही गिरावट देखिएको भए पनि यस साता भने लगानीकर्ताले राहतको सास फेरेका छन्।
नयाँ वर्षको पहिलो दिन सोमबार सार्वजनिक बिदा परेकाले कारोबार तीन दिन मात्र भयो। तर ती तीनै दिन बजारले हरियाली प्रदर्शन गर्यो।
पहिलो दिन आइतबार थोरै ओरालो लागेको बजार मंगलबारदेखि लयमा फर्कियो—मंगलबार २७.१४ अंक, बुधबार ७.०१ अंक र बिहीबार २६.४९ अंकको उकालो चढ्दै बजार समग्रमा ६० अंक माथि उक्लियो।
बजार बढेसँगै कारोबार रकममा पनि उल्लेख्य सुधार देखियो। आइतबार ६ अर्ब २८ करोडको कारोबार भएकोमा मंगलबार यो ८ अर्ब ५४ करोडमा पुग्यो।
बुधबार ७ अर्ब २६ करोडको कारोबारपछि बिहीबार त झन् १० अर्ब ७९ करोडसम्मको कारोबार हुँदै लगानीकर्ताको सक्रियता झल्किएको छ।
बजारको यस्तो सकारात्मक चालले नयाँ वर्षको सुरुवात उत्साहजनक हुने संकेत दिएको छ, जसले आगामी दिनहरूमा लगानीकर्ताको आत्मविश्वास अझ बढाउन सक्छ।
