दाङ,साउन २१ । दाङमा आफ्नै सौताको छोराको हत्या गरी २३ वर्षदेखि फरार रहेकी एक महिलालाई प्रहरीले पक्राउ गरेको छ ।
गढवा गाउँपालिका–७ मानपुरका ५० वर्षीया बसन्ता शर्मा पण्डितलाई काठमाडौंको नयाँ बसपार्क क्षेत्रबाट पक्राउ गरिएको जिल्ला प्रहरी कार्यालय दाङका प्रवक्ता डिएसपी चक्र बहादुर शाहले जानकारी दिए ।
२०५९ साल असार १९ गते आफ्नै सौताको ९ वर्षीय छोरा शरद शर्मालाई लाठी प्रहार गरी हत्या गरेर मलखादमा गाडेको अभियोगमा जिल्ला अदालत दाङले शर्मालाई २०६० साल असोज २६ गते दुई वर्ष कैद सजाय तोकेको थियो ।
तर पुनरावेदन अदालतले सोही वर्ष माघ ३ गते कैद सजाय बढाएर १० वर्ष पुर्याएपछि उनी फरार डिएसपी शाहले जानकारी दिए ।
अदालतको फैसलापछि शर्मा फरार भएकी थिइन । शर्मा काठमाडौंमा छोरा केशवराज शर्मासँग बस्दै आएको थाहा पाएपछि इलाका प्रहरी कार्यालय गढवाबाट प्रहरी टोली जोजतलासका लागि खटिएकोे थियो ।
गढवा प्रहरी टोलीले जिल्ला प्रहरी परिसर काठमाडौंको सहयोगमा नयाँ बसपार्कस्थित सडक खण्डमा शर्मालाई हिजो मंगलबार बिहान साढे ८ बजेतिर पक्राउ गरेको डिएसपी शाहले जानकारी दिए ।
शर्मालाई कैद सजाय भुक्तानका लागि दाङ जिल्ला अदालतमा पठाइएको प्रहरीले जनाएको छ ।
