तुलसीपुर, असार १६ । तुलसीपुरमा बर्षौंदेखि मोटरसाइकल मर्मतको काम गर्दै आएका अरुण योगीले मेहनतले राम्रो प्रगति गर्दै गएका छन् ।
जस्ले आज दैनिक मोटरसाइकल मर्मत र पाटपूर्जा बिक्रीबाट २० देखि ५० हजारसम्मको कारोबार गर्ने गरेको बताउँछन् । उनको आफ्नै मोटरसाइकलका पाटपूर्जा बेच्ने पसलपनि छ । उनकी श्रीमति जुनु त्यो पसल हेर्छिन ।
अरुणले तुलसीपुरमा आएर पसल गर्न थालेको २० बर्ष बिति सकेको छ । त्यो भन्दा पहिले १० बर्ष घोराहीमा काम गरेका थिए । त्यसपूर्व १३ बर्षको छँदै इण्डियामा २ बर्ष मोटरसाइकल बनाउने सीप सिकेका थिए ।
सबै गरि उनले ३१ बर्ष यो पेशामा बिताइ सकेका छन् । अरुणको दाङका मात्रै हैन आसपासका पहाडी जिल्लाहरुबाट मोटरसाइकल बनाउन मानिसहरु आउने गर्छन । मेहनत र इमान्दारिताले उनले धेरैको मन र भरोसा जितेका छन् ।
जस्ले आफ्नै मेहनतको कमाइले तुलसीपुर उपमहानगरपालिका – ६ रजौरामा लकडाउनको समयमा ८० लाखमा घर किनेका थिए । अहिले घर बढाए साढे २ तलाको पुर्याएका छन् ।
उनले रजौराको ‘ड्रिम्स ब्याङक्वीट’ नजिकै १ कठ्ठा क्षेत्रफलको घडेरी ११ बर्ष पहिले ४२ लाखमा किनेका थिए । त्यस्तै हाल गुरुकुल एकेडमी स्कूल रहेको नजिकै १० बर्ष अघि १५ लाखमा किनेको ५ धुरको घडेरीपनि छँदै छ । उनले गाउँको पुर्खेली जग्गा केही चलाएका छैनन् ।
अरुणको पुर्खेउली घर झन्डै १२ किलोमिटर दक्षिण कचिलामा हो । जहाँ उनीहरुको पुर्खेउली जमिन १० कठ्ठा जति छ । अरुण परिवारसहित बजारमै बस्न थालेको लकडाउन पछि हो ।
यहाँ सम्म आइपुग्न अरुणले थुप्रै पसिना बगाएका छन् । धेरै संघर्ष गरेका छन् । अरुण बजारबाट कचिला र कचिलाबाट बजार दिन रात नभनी दौडिए । कामका लागि झरी, सितलहर वा गर्मी सबै संग पैंठे जोरी खेले ।
अरुण र जुनुका दुई छोरी छन् । ठूली छोरी एमबिबिएसमा नाम निकाल्नका लागि तयारी गरि रहेकी छन् । अरुण भने छोरीले डाक्टरी पर्न चाहे सरकारी कोटामा नाम निकाल्न नसकेपनि निजीमै पढाउनका लागि पैंशा जम्मा गरि सकेको बताउँछन् । अर्की छोरी तुलसीपुरकै एक निजी बिद्यालयमा पढ्दै छिन ।
पछिल्लो समय अरुणले आफ्नो लागि एउटा कारपनि किनेका छन् ।
