दाङ, जेठ २९ । रुकुमपश्चिममा भएको मिनी ट्रक दुर्घटनामा परि दाङका एक जना चाकलको मृत्यु भएको छ । सहचालकपनि गम्भीर घाइते छन् ।
दुर्घटनामा परि दाङको घोराही उपमहानगरपालिका –१० का ४५ बर्षीय भुपेन्द्र महतको मृत्यु भएको रुकुम पश्चिमका प्रहरी प्रमुख डिएसपी प्रमेश बिष्टले जानकारी दिए ।
घाइते चालक महतलाई उपचारको लागि जिल्ला अस्पताल सल्ले पुर्याए लगतै चिकित्सकले मृत घोषणा गरेका थिए ।
उक्त दुर्घटनामा परि घोराही – १० कै सहचालक ३४ बर्षीय सुन्दरकुमार बुढा गम्भीर घाइते भएका छन् । डिएसपी बिष्टका अनुसार बुढालाई थप उपचारका लागि बाँकेका रिफर गरिएको छ ।
बिहीबार बेलुका सवा ६ बजेतिर रा १ क १४१२ नम्बरको मिनि ट्रक बेलुकी त्रिबेणी गाउँपालिका – २ सिमरुतमा दुर्घटनामा परेको थियो । ट्रक राप्ती राजमार्ग अन्तरगत खलंगातर्फ पानीको जार बोकेर जाँदै थियो ।
रारा प्रोसेसिङ कम्पनी प्रालिको पानीको जार बोकेको मिनी ट्रक सडकदेखि झन्डै २०० मिटर तल खसेको प्रहरीले जानकारी दिएको छ ।
मिनी ट्रक दुर्घटना हुँदा बिधुतको पोल ढल्न पुगी बाटो बन्द भएको र खुलाउने प्रयास जारी रहेको प्रहरीले बताएको छ ।
