तुलसीपुर, फागुन १९। झन्डै सात दशक पछि दाङको टरिगाउँ विमानस्थलको जग्गा अधिग्रहण गर्न भन्दै सरकारले एक करोड बजेट बिनियोजन गरेको छ ।
अब यस्ले टरिगाँउ एयरपोर्ट विस्तार हुने विश्वास पलाएको छ । एक करोड खर्चेरे नयाँ टावर निर्माण गरिएको थियो । त्यसको अघिल्लो बर्ष दाङ एयरपोर्टमा पहिलो पटक रिफ्यूलिङ टयाँकर ल्याइएको थियो ।
एयरपोटृको धावन मार्ग बिस्तार गर्ने आवश्य जग्गा अधिग्रहण गर्नका लागि एक करोड बजेट छुट्याएको छ ।
बिक्रम संबत २०१३ सालदेखि टरिगाँउ विमानस्थल सञ्चालनमा आएको थियो । जहाँ बर्षौंसम्म घाँसे मैदानमा विमान अवतरण हुँदै आएको थियो ।
पछिल्लो समय नेकपा माओबादीका लोकेन्द्र बिष्ट मगर पर्यटन मन्त्री हुँदा टरिगाँउ विमानस्थलको धावन मार्ग जम्मा ७३० मिटरमा मात्रै कालो पत्रे गरिएको थियो । त्यसैले टरिगाँउ एयरपोर्टमा साना विमान मात्रै अवतरण गर्न सक्छन् । यो एयरपोर्टको धावन मार्ग विस्तारको माग उठ्दै आएको थियो ।
त्यही भएर यो पटक विमानस्थललाई आवश्यक पर्ने जग्गा अधिग्रहणका लागि संस्कृति, पर्यटन तथा नागरिक उड्यन मन्त्रालयले एक करोडको बजेट बिनियोजन गरेको हो ।
फागुन १५ गते मन्त्रीस्तरिय निर्णय अनुसार जग्गा अधिग्रहणका लागि थप ९९ करोड रकम सुनिश्चित गर्न अर्थ मन्त्रालयलाई पत्रचार पनि गरेको छ ।
टरिगाउँ एरपोर्टको बिस्तारको लागि जग्गा अधिग्रहण गर्न ५ अर्ब लाग्ने आँकलन गरिएको भएपनि १ अर्ब रकम भए पुग्ने अनुमान गरिएको छ ।
तुलसीपुर उपमहानगरपालिका –१२ स्थित टरिगाउँ विमानस्थलको धानवगन मार्ग विस्तार भएमा एटिआर विमान चढ्न नेपालगन्ज वा भैरहवा जानु पर्ने बाध्यता अन्त्य हुने थियो । दाङ लुम्बिनी प्रदेशको राजधानी केन्द्र भएपनि हालसम्म यहाँ एटिआर जहाँज अवतरण गर्न सक्ने अवस्था छैन ।
त्यही भएर यहाँ १९ सिटे साना विमान मात्रै अवतरण गर्न सक्छन् । जस्ले गर्दा यात्रुलाई भाडादर महंगो पर्ने गर्छ ।
ठूला विमान आए भाडादर सस्तो हुने र यात्रुको यात्रापनि सहज रुपमा गर्न पाउने आशा सर्वसाधारणको छ ।
पछिल्लो समय माघ महिनामा प्रधानमन्त्री केपी शर्मा ओलीदेखि, पूर्व प्रधानमन्त्रीहरु शेरबहादुर खेउवा र पुष्पकमल दाहालपनि तुलसीपुर आउँदा टरिगाँउ एरपोर्टको विस्तार तथा तुलसीपुर – घोराही सडक खण्ड चार लेन बनाउने कुरा प्रमुख रुपमा उठाएका थिए ।
बर्षौंदेखि हरेक चुनाबमा उम्मेदवारहरुले आफ्नो प्रमुख चुनाबी नारा टरिगाँउ एरपोर्ट विस्तारलाई बनाउँदै आएको भएपनि भने अनुरुप काम भने हुन सकेको छैन । जस्ले गर्दा नेताहरुको आलोचना हुँदै आएको छ ।
दाङको एरपोर्टसहित जुम्ला विमानस्थलका लागि दश करोड बजेट बिनियोजन भएको छ भने थप ४० करोड स्रोत सुनिश्चिताको माग गरिएको छ । त्यस्तै सुर्खेत बिमानस्थलको जग्गा अधिग्रहणका लागि १० करोड बिनियोजन भएको छ भने थप ४ अर्ब ९० करोड बजेट सुनिश्चिताको माग भएको छ ।
