तुलसीपुर,पुस १२ । तुलसीपुर उपमहानगरपालिकाका प्रमुख प्रशासकीय अधिकृत गेहेन्द्र बहादुर डाँगीको कार्यकक्षमा तालाबन्दी भएको छ ।
प्रमुख प्रशासकीय अधिकृत डाँगी कार्यकक्षमै भएको समयमा सर्पदंश उद्धारकर्ता प्रभाव भण्डारीले बाहिरबाट ताला लगाएका हुन ।
सबै प्रक्रिया पुरा गर्दा समेत प्रमुख प्रशासकीय अधिकृत डाँगीले सर्प महोत्सवको भुक्तानी दिन आनाकानी गरेपछि प्रमुख प्रशासकीय अधिकृतको कार्यकक्षमा ताला लगाईएको हो ।
तुलसीपुर उपमहानगरपालिका वडा नं. ७ मा गत कात्तिक ८ गतेदेखि १० गतेसम्म सर्प महोत्सव आयोजना भएको थियो ।
उक्त महोत्सवमा तुलसीपुर उपमहानगरपालिकाले ४ लाख रुपैयाँ दिने सहमति भएको थियो ।
सबै प्रक्रिया पुरा गरेर विल कार्यपालिका बैठकमा पेश भएर कार्यपालिकाको बैठकले ४ लाख रकम दिने निर्णय गर्दा समेत डाँगीले रकम दिन आनाकानी गरेपछि उनको कार्यकक्षमा ताला लगाइएको हो ।
अहिले प्रहरी आएर ताला खोलेर सहमतिका लागि छलफल जारी छ ।
