दाङ, कात्तिक २८ । पशुपक्षीमाथि निर्दयी व्यवहार गरेको अभियोगमा कपिलबस्तु प्रहरीले चार जनालाई पक्राउ गरेको छ।
पक्राउ पर्नेमा ट्रक चालक विराटनगर उपमहानगर–३ का ३८ वर्षीय हेमु श्रेष्ठ, २७ वर्षीय रमेश श्रेष्ठ, सुनसरी कुसाहा नगरपालिका – १३ का ५५ वर्षीय इर्साद आलम र २७ वर्षीय समिम आलम रहेका छन् ।
मंगलबार दिउँसो कपिलबस्तुको बुद्धभूमि नगरपालिका– २ स्थित पूर्वपश्चिम राजमार्गबाट उनीहरूलाई पक्राउ गरिएको जिल्ला प्रहरी प्रबक्ता डिएसपी मोहनमणि अधिकारीले जानकारी दिएका छन् ।
इलाका प्रहरी कार्यालय गोरूसिंगेबाट खटिएको प्रहरी टोलीले बा . प्र ०३– ००१ ख १९९२ नम्बरको ट्रक शंका लागेर जाँच गर्ने क्रममा ट्रकभित्र २४ वटा गोरू पशु पंक्षी ओसार पसार गर्दा अपनाउनु पर्ने मापदण्ड बिपरित राखेको फेला पारेको थियो । गोरूका पुच्छर बाँधेर झुण्ड्याइएको, नाक डोरीले छेडिएको अवस्थामा गोरु फेला परेका थिए।
साथै दुइटा गोरूको सिङबाट रगत बगेको, ट्रकमा त्रिपालले छोपेर राखिएको अवस्थामा फेला परेको प्रहरीले जनाएको छ । ट्रकपनि प्रहरीले नियन्त्रणमा लिएको छ ।
प्क्राउ परेकाहरु माथि थप अनुसन्धानका लागि जिल्ला प्रशासन कार्यालय कपिलवस्तले मंगलबारदेखि लागु हुने गरि ७ दिन हिरासतमा राख्न अनुमति दिएको छ ।
