२०७७ मङ्सिर १४ गते आइतवार

राप्ती राजमार्ग भोलिदेखि २५ गतेसम्म दिनभर बन्द हुने


दाङ, बैशाख ६ ।
राप्ती राजमार्ग शनिबारदेखि बैशाख २५ गतेसम्म दिनभरजसो बन्द हुने भएको छ । तुलसीपुर उपमहानगरपालिका वडा नं. ३ स्थित राम्रीको मोड काट्ने कार्य भइरहेको हुँदा शनिबारदेखि उक्त राजमार्ग अधिकांस समय बन्द हुने भएको छ । राम्री मोड काट्ने जिम्मा लिएको उज्ज्वल निर्माण सेवाका प्रोप्राईटर दिपक न्यौपानेले कटिङको काम हुँदा सम्भावित जोखिमका कारण सडक खण्ड आंशिक रुपमा सञ्चालन गरिने जानकारी दिए ।

न्यौपानेका अनुसार शनिबार बिहान ११ बजेदेखि बेलुका ४ बजेसम्म र राति १ बजेदेखि बिहान ५ बजेसम्म उक्त सडक खण्ड बन्द गरिने भएको छ । गलत रोड इञ्जिनियरिङले गर्दा राम्रीको मोडबाट पटक–पटक सवारी दुर्घटना हुने गरेको प्रदेश प्रहरीको निष्कर्षपछि राम्रीको मोड काट्न टेण्डर आह्वान गरिएको थियो ।

यही ठाउँमा पुस ६ गते भएको बस दुर्घटनामा परी घोराहीमा अध्यनरत १९ विद्यार्थी, २ शिक्षक र चालक, सहचालक गरी २३ जनाको मृत्यु भएपछि प्रहरीले त्यो बारे बुझ्न छानबीन समिति गठन गरेको थियो ।

५ नं. प्रदेश प्रहरी कार्यालय तुलसीपुर दाङका एसएसपी नरबहादुर केसीको संयोजकत्वमा गठित छानबीन समितिले आफ्नो प्रतिवेदनमा गलत रोड इञ्जिनियरिङले गर्दा राम्रीमा पटक–पटक दुर्घटना हुने गरेको निष्कर्ष निकाल्दै त्यहाँको ढिस्को काट्न सुझाएको थियो । यही भिरबाट गत चैतमा ना ६ ख ५४१४ नम्बरको ट्रक खसेको थियो ।

सल्यानबाट तुलसीपुरतर्फ आउँदै गरेको उक्त ट्रक राम्री भिरबाट खसेपछि टुक्रा–टुक्रा भएको थियो । राम्री भिरमा विगतका वर्षमा एउटा मोटरसाइकल र एउटा ट्याक्टर पनि दुर्घटनामा परेका थिए ।

प्रकाशित मिति : २०७६ बैशाख ६ गते शुक्रवार
प्रतिक्रिया दिनुहोस

Leave a Reply

Your email address will not be published. Required fields are marked *