तुलसीपुर, भदौ २ । सामुदायिक वनका पदाधिकारीहरुको मिलेमतोमा ठूलो संख्यामा बहुमुल्य रुखहरु काटेर स्वाहा पारिएको छ ।
राजपुर गाउँपालिका वडा नं. ५ जंग्रहवास्थित मैनिहवा सामुदायिक वन भित्र साल, सतिसाल लगाएत बिभिन्न जातका ४ सय ८४ क्यिू फिट काठका गोलियाहरु काटेर जंगलमा राखेको अवस्थामा फेला परेको हो ।
सव डिभिजन कार्यालय बेलाबाट गएको गस्ति टोलीले साउन २५ गते ती काठ फेला पारेपछि डिभिजन वन कार्यालय दाङमा सूचना दिएको थियो ।
डिभिजन कार्यालय दाङको निर्देशनमा त्यसपछि ती काटहरु बरामद गरिएको डिभिजन वन कार्यालय देउखुरीका सूचना अधिकारी प्रेमिलालप्रशाद साहले फरकोणलाई बताए ।
‘सामुदायिक वन भित्र काटेर घाटगद्दी गरेको अवस्थामा चार सय ८४ क्यिू फिट बिभिन्न जातका काठका गोलियाहरु हामीले बरामद गरेका छौं,’ साहले भने ‘ ती रुखहरु केही दिन पहिले मात्रै काटेको जस्तो छ ।’ घटना बारे अनुसन्धान जारी रहेको उनले बताए ।
ठूलो संख्यामा सामुदायिक वनबाट रुखहरु काटेको खवर पछि बुधबार प्रमुख जिल्ला अधिकारी रामबहादुर कुरुम्बाङ, जिल्ला प्रहरी प्रमुख एसपी सुरेश काफ्ले, डिभिजन वनका पदाधिकारीहरु घटना स्थल तर्फ लागेका छन् ।
सामुदायिक वनको पदाधिकारीको मिलेमतोविना ती रुखहरु काटिएको सूचना प्रहरीलाई स्थानीयले दिएको एसपी काफ्लेले बताए ।
वन सम्बन्धि मुद्दा डिभिजन वनले नै हेर्ने भएको हुँदा अनुसन्धान पछि दोषी देखिन आए वनले भनेका मानिसहरु पक्राउ गरि प्रहरीले डिभिजन वनलाई आवश्यक कारबाहीका लागि बुझाउने एसपी काफ्लेले बताए ।
तस्बिर – एसपी सुरेश काफ्ले
