काठमाडौं,बैशाख ५ । कक्षा १२ को परीक्षा सारिएको भनी सामाजिक सञ्जालमा फैलिएको हल्लाप्रति राष्ट्रिय परीक्षा बोर्डले कडा आपत्ति जनाएको छ।
बोर्डले स्पष्ट पारेको छ कि परीक्षा तोकिएकै मितिमा यही वैशाख ११ गतेदेखि सञ्चालन हुनेछ र यसमा कुनै परिवर्तन गरिएको छैन।
शिक्षकहरूको आन्दोलनका कारण परीक्षा सारिएको भन्ने जस्ता भ्रामक सूचनाले विद्यार्थीहरूमा अनावश्यक त्रास र भ्रम सिर्जना गरिरहेको भन्दै बोर्डले गम्भीर ध्यानाकर्षण भएको जनाएको छ।
यस्ता गलत सूचना फैलाउनेहरूमाथि कानूनी कारबाहीको प्रक्रिया अगाडि बढाइने चेतावनी दिँदै बोर्डले परीक्षा वातावरण बिगार्ने गतिविधिबाट टाढा रहन सबैलाई आग्रह गरेको छ।
साथै, विद्यार्थीहरूले ढुक्क भएर तयारी गर्न सकून् भन्ने हेतुले बोर्डले शिक्षक, अभिभावक र विद्यालय प्रशासनसँग सहकार्यको अपिलसमेत गरेको छ।
प्रकाशित मिति : २०८२ बैशाख ६ गते शुक्रवार
