तुलसीपुर, कात्तिक २६ । भदौ २४ गते जेनजी आन्दोलनका नाममा उच्च अदालत तुलसीपुर र अस्थायी प्रहरी पोष्ट बसपार्कमा तोडफोड र आगजनी गरेको आरोपमा पाँच जना पक्राउ परेका छन् ।
उच्च अदालत तुलसीपुरमा तोडफोड र आगजनी गरेको आरोपमा तुलसीपुर उपमहानगरपालीका –७ राजापुरका २६ बर्षीय रुपेश नेपाली र सल्यानको बागचौर नगरपालिका –२ घर भइ दाङको तुलसीपुर –९ बेलुवामा डेरा गरि बस्ने १८ बर्षीय सुनिल वली पक्राउ परेको इलाका प्रहरी कार्यालय तुलसीपुरका प्रमुख डिएसपी होमबहादुर पराजुलीले जानकारी दिए ।
त्यस्तै अस्थायी प्रहरी पोष्ट बसपार्क तुलसीपुरमा ढुँगा मुडा, तोडफोड र चोरी गरेको आरोपमा तुलसीपुर उपमहानगरपालिका –५ बसपार्कका २० बर्षीय करण सुनार, सोही वडाका १८ बर्षीय मुकेश भण्डारी र तुलसीपुर – ६ शान्तिनगर टोल बस्ने १८ बर्षीय ज्ञानेन्द्र गन्धर्व रहेका छन् ।
इप्रका तुलसीपुरका प्रबक्ता प्रहरी निरीक्षक बिनोदराज खत्रीका अनुसार पक्राउ परेका पाँचै जनालाई पाँच दिन थुनामा राखेर घटना अनुसन्धान गर्न जिल्ला अदालतले बुधबार आदेश दिएको छ ।
पक्राउ परेका सबै बिरुद्ध आपराधिक प्रवेश तथा आपराधिक उपद्रव सम्बन्धि कसुरमा मुद्दा चलाउने गरि अनुसन्धान भइ रहेको प्रहरी निरीक्षक खत्रीले बताए ।
