दाङ,माघ २७ । नेपाली कांग्रेसका सभापति शेरबहादुर देउवाले कांग्रेस भित्र बलियो एकता हुन सके कांग्रेसलाई कुनै पनि शक्तिले परास्त गर्न नसक्ने बताएका छन् ।
उनले पार्टी भित्र बलियो एकता जरुरी रहेको बताउँदै कार्यकर्ताहरुलाई एक हुन निर्देशन दिए ।
कांग्रेस दाङले आइतबार घोराहीमा आयोजना गरेको कार्यकर्ता भेटघाटमा सभापति देउवाले भने ‘हामी मिले हामीलाई कसैले पनि हराउन सक्दैन, पार्टी भित्र एकता हुन जरुरी छ ।’
उनले पार्टी भित्र बलियो एकता कायम हुन सके कुनै पनि निर्वाचनमा कांग्रेसलाई कसैले पनि हराउन नसक्ने दाबी गरे ।
पार्टीलाई बलियो बनाउनका लागि विकासका काममा समेत कांग्रेसका नेता तथा कार्यकर्ताहरु एक बन्नु पर्ने समेत देउवाले बताए । उनले दाङमा रहेको विमानस्थल स्तरबृद्धि अपरिहार्य रहेको समेत बताए ।
साथै तुलसीपुरमा रहेको बिमानस्थल स्तरबृद्धिका लागि विज्ञहरुसंग परामर्श गर्ने भन्दै देउवाले प्रधानमन्त्री केपी शर्मा ओली संग यसबारेमा आफूले छलफल गर्ने समेत बताए ।
‘दाङमा ठूला जहाज उडानका लागि यहाँको बिमानस्थललाई बिस्तार गर्न जरुरी छ , दाङका लागि यो निकै आवश्यक छ,’ सभापति देउवाले भने ‘विमानस्थल स्तरबृद्धिका लागि मैले विज्ञहरुसंग छलफल गर्छु र अहिलेका प्रधानमन्त्रीले पनि भनेको मान्नु हुन्छ भन्नेमा म बिश्वस्त छु ।’
नेपाली कांग्रेस दाङका जिल्ला सभापति शंकरप्रसाद डाँगीको अध्यक्षतामा भएको कार्यक्रममा सभापति देउवाले सबै वर्ग समुदायलाई अधिकारको प्रत्याभूत हुने गरि काम रिनु पर्ने बताए ।
हरेक नागरिकलाई समान अधिकार दिइनु पर्ने भन्दै देउवाले कसैलाई पनि पक्ष वा विपक्षमा राख्न नहुने बताए ।
