२०७७ कार्तिक १३ गते बिहिवार

बालश्रम अन्त्यका लागि चेतना आवश्यक


घोराही, १३ चैत ।
घोराही उपमहानगरपालिकाका नगरप्रमुख नरुलाल चौधरीले बालश्रम अन्त्यका लागि अभिभावकहरुको चेतनास्तर बृद्धि प्रमुख प्राथमिकता हुनुपर्ने बताएका छन् । युनिसेफको सहयोग तथा सिविसको आयोजनामा दाङको घोराहीमा सुरु भएको दुईदिने ‘तथ्याङ्क सङ्कलन, दस्तावेजीकरण तथा प्रतिवेदन लेखन तालिम’को उद्घाटन गर्दै नगरप्रमुख चौधरीले बालश्रम अन्त्य गरेमात्रै समृद्धि हासिल गर्न सकिने बताए ।

मानव शंसाधन विकास नै राज्यको समृद्धिको आधार भएको बताउँदै प्रमुख चौधरीले बालबालिकाहरुमा लगानी गरे भोलिको देशको समृद्धि सुनिश्चित हुने धारणा राखे । जोखिममा रहेका बालबालिकाहरुलाई तत्काल उद्धार गरी सुरक्षित गर्ने गरी बालबालिकासँग क्रियाशील संघसंस्थाहरु सँगसँगै अगाडि बढ्न आफू आतुर भएको बताउँदै चौधरीले समुन्नत समाज निर्माणका लागि बालबालिकामा लगानी गर्नुपर्ने बताए ।

परिवारमा बालमैत्री वातावरण नहुँदा एवं अभिभावकले बालबालिकालाई हेरचाहमा ध्यान नदिँदा बालबालिकाहरु श्रम शोषणमा पर्ने गरेको हुँदा अभिभावक केन्द्रित कार्यक्रमहरुमा जोड दिनुपर्ने उनको भनाइ थियो । कार्यक्रममा बोल्दै युनिसेफ नेपालका बाल संरक्षण अधिकृत शिवशंकर डङ्गोलले बालश्रम अन्त्यका लागि युनिसेफले क्षमता अभिवृद्धिका कार्यक्रम, सूचना व्यवस्थापन प्रणालीको विकास गर्ने, व्यवहार परिवर्तनका लागि सूचना दिने खालका कार्यक्रम, सीपमूलक तालिम, सरकारलाई सहयोग गर्नेलगायतका विभिन्न खालका कार्यक्रममा सहयोग गर्दै आएको बताए ।

साथै उनले युनिसेफले आफ्नो दायरालाई बढाउँदै सामाजिक सुरक्षाका क्षेत्रमा समेत काम गरिरहेको धारणा राखे । अहिलेसम्म ६ हजार बालबालिकाहरुलाई घटना व्यवस्थापन प्रक्रियामा लगी आवश्यक सेवा दिइएको, ४ हजार बाल मजदुरहरुलाई औपचारिक शिक्षामा जोडिएको, व्यवहार परिवर्तनका लागि घरदैलोमा पुगी सचेतना दिने काम भइरहेको उनलेब ताए ।

बालश्रम विज्ञ उद्धवराज पौडेलले बाल संरक्षणका क्षेत्रमा भएका कामहरुलाई राम्रोसँग अभिलेखीकरण गरी प्रतिवेदन लेख्नलाई सहज बनाउनका लागि तालिम फलदायी हुने अपेक्षा व्यक्त गरे । बालमैत्री स्थानीय स्थितिपत्र तयार पार्दाका विभिन्न समस्याहरु खड्किरहँदा कार्यक्रम आयोजना गर्नु परेको उनको धारणा थियो ।

समाज सेवा तथा मानव अधिकारमा महिला र बालबालिका (सिविस)का कार्यकारी निर्देशक डा. अशोक पाण्डेले बाल संरक्षणका क्षेत्रमा हालसम्म भएका उपलब्धिहरुलाई सुरक्षित गर्न यो तालिम आयोजना गरिएको बताए । दिनरात खटेर भएका कामहरुलाई व्यवस्थित रुपमा दस्तावेजीकरण गर्न तालिम उपलब्धिपूर्ण रहने अपेक्षा राखेको बताउँदै उनले आजका दिनमा भएका कामहरु सुरक्षित राख्न सके वर्षौंपछिसम्मका लागि समेत उपयोगी हुने बताए ।

युनिसेफ नेपालबाट बाल संरक्षण कार्यक्रम सञ्चालन भइरहेका १६ वटा नगरपालिकामा तथ्याङ्क संकलन, दस्तावेजीकरण तथा रिपोर्टिङ कार्यलाई सहज बनाउनका लागि तालिम आयोजना गरिएको बताउँदै कार्यक्रमको अध्यक्ष समेत रहेका डा. पाण्डेले तालिमले बाल संरक्षणका क्षेत्रमा भएका उपलब्धिहरुलाई दस्तावेजीकरणमा सहयोग पुग्ने बताए ।

सिविसका कार्यक्रम अधिकृत भरत अधिकारीको स्वागत मन्तव्यबाट सुरु भएको कार्यक्रमको सञ्चालन सिविसका परामर्शदाता रमेश पौडेल गरेका थिए । कार्यक्रममा पूर्व विराटनगरदेखि पश्चिम बैतडीसम्मका १६ वटा नगरपालिकाकाका प्रतिनिधि तथा बाल संरक्षण कार्यक्रम सञ्चालन गरिरहेका साझेदार संघसंस्थाका प्रतिनिधिहरुको सहभागिता रहेको छ । तालिमको प्रशिक्षकमा बालअधिकार विज्ञ उद्धवराज पौडेल, रमेश पौडेल र डा. अशोक पाण्डे रहेका छन् ।

प्रकाशित मिति : २०७५ चैत्र १३ गते बुधवार
प्रतिक्रिया दिनुहोस

Leave a Reply

Your email address will not be published. Required fields are marked *