दाङ, फागुन २५ । घरमा चोरी गरेको अभियोगमा तुलसीपुर वाट एकजना भारतिय नागरिक पक्राउ परेका छन् । पक्राउ पर्नेहरुमा भारतको बिहार जिल्ला मोतिहारी ग्राम पञ्चायत स्लामापुर छोट्का छोप्कैया वडा नं.७ निवासी २६ बर्षीय किस्मत महतो रहेको ईलाका प्रहरी कार्यालय तुलसीपुरका प्रमुख एवं डिएसपी प्रेमबहादुर शाहीले जानकारी दिए ।
तुलसीपुर उपमहानगरपालिका वडा नं. ९ बेलुवा स्थित जनक शाहीको घरमा कोही नभएको मौका छोपी चोरी गर्दै गरेको अवस्थामा महतोलाई स्थानीयको सहयोगमा पक्राउ गरिएको प्रहरीले जानकारी दिएको छ ।
शुक्रवार दिउँसो ढोकामा लगाएको ताला फोडी चोरी गर्ने क्रममा स्थानीयले देखेपछि स्थानीय र प्रहरी मिलेर लखेटेर महतोलाई पक्राउ गरिएको प्रहरीले बताएको छ ।
पक्राउ परेका महतोको साथ बाट प्रहरीले ६८ हजार ६ सय ३० रुपैंया नगद, १ थान छड्के तिलहरी, १ थान मंगलसुत्र, भाँचिएको बाला १ थान,२ थान झालर र २ थान आंैठी बरामद भएको प्रहरीले जानकारी दिएको छ ।
