तुलसीपुर , मंसिर ४ । दाङको तुलसीपुर उपमहानगरपालिका वडा नं. १० स्थित पातु बनगाउँ माविमा पहिले खसेका ९१ मत गर्ने सहमति पछि पुनः मतदान सुरु भएको छ ।
दलहरुका बीचमा भएको सहमति अनुसार पहिले खसेका सबै ९१ मत बदर गरिएका हुन ।
यहाँ पहिले खसेका मत पेटीका सबै फिर्ता लगि नयाँ मत पेटी ल्याइ पुनः मतदान सुरु गरिएको थियो । पहिले मतदान भएका मत पेटीका मुचुल्का बनाइ सबै हटाइएको छ ।
मतदान केन्द्रकी मतदान अधिकृत पुष्पलता घर्तीले जानजान नभइ भुलबस गल्ती भएको बताइन । यहाँ कर्मचारीको गल्तीले गर्दा दोस्रो पटकको बन्डल पठाउँदा सबै प्रदेश सभाको मतपत्र मात्रै मतदातालाई उपलब्ध गराइएको थियो ।
४२ जनाले मत खसालिसकेपछि प्रतिनिभिसभाका सदस्यकोमा मतदान नभएको तथ्य पत्ता लागेपछि केही घन्टा मतदान स्थगित गरिएको थियो ।
त्यही समय परिपुर्तीका लागि बेलुका सात बजेसम्म डोरी भित्र प्रबेश गरेका मतदातालाई मतदान गर्न दिने निर्णय भएको मतदान अधिकृत घर्तीले जानकारी दिइन ।
दाङ क्षेत्र नम्बर ३ मा पर्ने तुलसीपुर– १० को मावि पातु बनगाउँ केन्द्रको मतदानस्थल ‘ग’ मा स्थगित मतदान फेरि दिउँसो १ बजेदेखि सुरु भएको हुँदा यो मतदान केन्द्रमा समय थपिएको हो ।
यो मतदान केन्द्रमा भोट हालेर गएका मतदाताहरूलाई फेरि बोलाएर मतदान सुरू गरिएको हुँदा मतदाता नछुटुन भनेर बेलुका सात बजेसम्म मतदानको समय थपिएको निर्वाचन क्षेत्र नं. ३ का निर्वाचन अधिकृत डोलनाथ न्यौपानेले बताए ।
