तुलसीपुर, वैशाख ३ । संक्रमित महिलासंगै यात्रा गरेकी घोराहीकी एक महिलासहित चार जनाको परीक्षण रिपोर्ट नेगेटिभ आएको छ ।
मंगलवार तुलसीपुरस्थित बेलझुण्डी कोरोना विषेश अस्पतालवाट नौं जनाको स्वाब परीक्षणको लागि भैरहवा पठाइएको थियो ।
त्यस मध्य बीरगन्जवाट कैलाली पुगेकी एक ६५ बर्षीया संक्रमित महिलासंगै संगै यात्रा गरेकी घोराही उपमहानगरपालिका वडा नं. १४गोरखा टोल निवासी ६२ बर्षीया महिला, उनका परिवारका थप दुई सदस्य र राजपुर गाउँपालिकाका अर्का एक युवाको रिपोर्ट नेगेटिभआएको छ ।
मंगलवार पठाइएका मध्य अब घोराहीकी ती महिलाका परिवारका थप ३ सदस्य र राजपुर गाउँपालिकाका अर्का एक युवाको रिपोर्टआउन बाँकी रहेको छ । उनीहरु सबैको रिपोर्ट पनि बुधवार बेलुका सम्म आइपुग्ने जानकारी दिइएको छ ।
चैत १७ गते कैलाली पुगेकी महिला र दाङ घोराहीकी एक महिलाले एउटै बसमा यात्रा गरेको सोमवार पत्ता लागेपछि ती महिलाका घरपरिवाकार थप पाँच जनालाई पनि बेलझुण्डी अस्पतालको आइसोलेसनमा लगेर राखिएको थियो ।
थप पाँच आइसोलेसनमा
अब बेलझण्डी अस्पतालको आइसोलेसनमा संक्रमित महिला संगै यात्राका दाङको भालुवाङ क्षेत्रका थप पाँच जना रहेका छन् । उनीहरुसबै राप्ती गाउँपालिकाका हुन ।
मंगलवार बेलुका मात्रै उनीहरुलाई अस्पताल पुर्याएको थियो । उनीहरुको स्वाब संकलन हुन भने अझैं बाँकी नै छ ।
यसअघि बेलझुण्डी अस्पतालवाट ४० जनाको स्वाब परीक्षणको लागि काठमाडौं पठाइएकोमा सबैको रिपोर्ट नेगेटिभ आएको थियो ।
