दाङ, भदौ १ । दाङको दंगीशरणका एक युवकको गएराति सवारी दुर्घटनामा परि मृत्यु भएको छ ।
तुलसीपुर बजारबाट घर तर्फ जाँदै गरेका दंगीशरण गाउँपालिका – ५ का २५ बर्षीय सम्राट गिरीले चलाएको मोटरसाइकल बाटोमा रोकिराखेको ट्रयाक्टरको पछाडिको भागमा ठोक्किएको थियो ।
राति १० बजेतिर तुलसीपुर बजारदेखि पश्चिम तर्फ जाँदै गरेका गिरी सवार लु.प्र.०२–००१ प ०९४६ नम्बरको मोटरसाइकल दंगीशरण – ५ डाँडाचिसमा रोकिराखेको रा १ त १४२२ नम्बरको ट्याक्टरमा पछाडिबाट ठोक्किएपछि गम्भीर घाइते भएका थिए ।
गिरीलाई उपचारका लागि तुलसीपुरस्थित राप्ती प्रादेशिक अस्पताल ल्याइएको थियो । उपचारका क्रममा राति ११ ः ५५ बजे चिकित्सकले उनलाई मृत घोषणा गरेको इलाका प्रहरी कार्यालय तुलसीपुरका प्रबक्ता प्रहरी निरीक्षक प्रकाश थापाले बताए ।
चालक बबई गाउँपालिका – ७ का २९ बर्षीय इन्द्रबहादुर डाँगीलाई प्रहरीले नियन्त्रणमा लिएको छ । घटनाबारे थप अनुसन्धान जारी रहेको प्रहरीले बताएको छ ।
