दाङ, माघ १४ । बाँके प्रहरीले दुर्लभ बन्यजन्तु रेडपाण्डाको दूई थान छालासहित तीन जना पक्राउ गरेको छ । सुर्खेत भेरीगंगा नगरपालिका १० का ४० वर्षीय दलबहादुर शाही, जाजरकोट जुनिचाँदी गाउँपालिका ११ का ४२ वर्षीय धनबहादुर शाही र सल्यान वनगाड कुपिन्डेदह नगरपालिका ४ का ३३ वर्षीय भरतबहादुर पुन रेडपाण्डाको छालासहित पक्राउ परेका छन् ।
बाँकेको कोहलपुर नगरपालिका वडा नं. १२ चप्परगौरीस्थित दैलेखी होटलबाट बुधवार दिउँसो उनीहरु पक्राउ परेका हुन । पक्राउ परेकाहरु माथि आवश्यक अनुसन्धान जारी रहेको जिल्ला प्रहरी प्रमुख एसपी ओम रानाले जानकारी दिए ।
पक्राउ परेका तीनै जनालाई आवश्यक कारबाहीको लागि बाँके राष्ट्रिय निकुञ्जको कार्यालयमा पठाइएको प्रहरीले बताएको छ ।
प्रकाशित मिति : २०७७ माघ १४ गते बुधवार
