शंकर केसी,
सल्यान, फागुन ३० ।विश्वलाई नै त्रसित बनाईरहेको कोरोना भाईरस (कोभिड १९) को सम्भावित जोखिमबाट बच्न सल्यान कपुरकोटमा स्वास्थ्य सहायकता कक्ष (हेल्थ डेस्क) स्थापना भएको छ । शुक्रबार कर्णाली प्रदेश स्वास्थ्य निर्देशनालयका निर्देशक रीता भण्डारी सहितको टोलि कपुरकोट आएर हेल्थ डेस्क स्थापना गरेको हो ।
कपुरकोट स्वास्थ्य चौकी संचालन तथा व्यवस्थापन समितिका अध्यक्ष मिनबहादुर सेनको अध्यक्षतामा कार्यक्रम भएको हो । निर्देशक भण्डारीले हाललाई स्थानीय तहका स्वास्थ्यकर्मीहरुको व्यवस्थापन गरि हेल्थ डेस्क संचालन गरिने बताइन् ।
कपुरकोट स्वास्थ्य चौकीका इन्चार्ज देवेन्द्रकुमार सेनले शनिबार हेल्थ डेस्कमा ३ जना कर्मचारी खटिने जानकारी दिए । कपुरकोट स्थित प्रहरी चेक पोइन्ट नजिकै हेल्थ डेस्क स्थापना गरिएको छ । केहि दिनमै प्रदेशबाट थप जनशक्तिको व्यवस्थापन गरिने निर्देशक भण्डारीले बताइएकी छन् ।
कर्णाली सरकारले गत शुक्रबार शुक्रबार बबई, हुम्लाको हिल्सा, सल्यानको कपुरकोट, पश्चिम सुर्खेतको जामुकुहिने र सुर्खेत विमानस्थल गरी पाँच स्थानमा हेल्थ डेस्क स्थापना गरेको छ ।आवश्यकता अनुसार प्रदेशका डोल्पा, मुगु, दैलेख, कालिकोट लागायतका ठाउँबाट प्रदेशका अन्य स्थानमा समेत हेल्थ डेस्क राख्ने गरिएको छ ।
