तुलसीपुर, कात्तिक ८ । भालुवाङबाट सशस्त्र प्रहरीका एक सहायक हवल्दार र एक जना जवान यौन दुब्र्यबहारको आरोपमा पक्राउ परेका छन् ।
भालुवाङस्थित २९ नम्बर ज्वालामाई गणमा कार्यरत सहायक हवल्दार भरत रोका मगर र जवान रेवन पचभैया मगरलाई पक्राउ गरि सशस्त्र आँफैले प्रहरीको जिम्मा लगाएको हो ।
उनीहरुलाई बुधबार पक्राउ गरि प्रहरीलाई बुझाइएको सशस्त्र प्रहरीका केन्द्रीय सहायक प्रबक्ता डिएसपी सैलेन्द्र थापाले बताए ।
जिल्ला प्रहरी प्रमुख एसपी अर्जुन तिमिल्सिनाले पनि दुई जना सशस्त्रका ब्यक्तिहरु पक्राउ परेको जानकारी दिए ।
असोज २४ गते बेलुकी पख गण नजिकै पिङ खेल्न गएका एक जना ८ बर्षीया र अर्की १४ बर्षीया बालिकामाथि अपरिचित ब्यक्तिले बलात्कार गरेको भन्दै पीडितका आफन्तले सोही दिन नै प्रहरीलाई खबर गरेका थिए ।
प्रहरीले बलात्कारमा संलग्न ब्यक्ति पहिचान गर्न नसकिरहँदा आक्रोसित स्थानीयले बिरोध पर्दशनहरु थालेका थिए । कात्तिक ७ गते बुधबार मात्रै स्थानीयले भालुवाङ बजार बन्द गराउनुका साथै भालुवाङस्थित सशस्त्र प्रहरीको २९ नम्बर ज्वालामाई गणमासमेत घेराउ गरेका थिए ।
यो भन्दा अघिल्लो बुधबार पीडित ८ बर्षीया बालिकाकाको तर्फबाट अभिभावकले जिल्ला प्रहरीमा जाहेरी दिएका थिए ।
