तुलसीपुर, फागुन १२ । सल्यानका दूई व्यक्ति तुलसीपुरमा बाघको छालासहित पक्राउ परेका छन् । सल्यानको बागचौर नगरपालिका वडा नं. ९ का २९ बर्षीय सन्दिप डाँगी र शारदा नगरपालिका वडा नं. १५ का ३७ बर्षीय ईन्द्रबहादुर थापा बिक तुलसीपुर उपमहानगरपालिका वडा नं. ४ गोठिखोलाबाट पक्राउ परेको प्रहरीले जनाएको छ ।
मंगलबार बिहान २ बजे रा १ प ८८४७ नं. को मोटरसाईकलमा सल्यानबाट तुलसीपुर तर्फ आउदै गरेको अवस्थामा प्रहरीले उनीहरुलाई पक्राउ गरेको थियो । उनीहरुको साथबाट कालो झोलामा लुकाई राखेको पुच्छरको भागदेखि टाउको सम्मको ४ फिट ५ ईन्च लम्बाई १ फिट चौडाईको छाला बरामद भएको प्रहरीले जनाएको छ ।
त्यस्तै अगाडिका दूई खुट्टा २ फिट २ ईन्च लम्बाई, पछाडिको दूई खुट्टाको ३ ईन्च ३ फिट लम्बाई रहेको प्रहरीले जनाएको छ । पक्राउ परेका बिक र डाँगीलाई थप अनुसन्धान र कारबाहीका लागि जिल्ला वन कार्यालय पठाइएको प्रहरीले बताएको छ ।
