झापा,मंसिर १९ । पत्रकारमाथि आक्रमण गर्ने मालपोत कार्यालय दमकका खरदार इन्द्र राजवंशी पक्राउ परेका छन् ।
मालपोत कार्यालय दमकमा मंगलबार दिउँसो मालपोत कार्यालयमै पत्रकार खगेन्द्र घिमिरे, क्यामेरा पर्सन भास्कर श्रेष्ठ र एक सेवाग्राहीलाई कुटपिट गरेको आरोपमा राजवंशी पक्राउ परेका हुन् ।
शिवसताक्षीका सेवाग्राही सुरेश साहले राजवंशीलाई दश हजार रुपैयाँ घुस दिएको भिडियो खिचिरहेको अवस्थामा लछारपछार गर्दै कार्यालय प्रमुखको कार्यकक्षमा लगेर उनले पत्रकार, क्यामरा म्यान र साहलाई समेत कुटपिट गरेको बताइएको छ ।
घटनाको नेपाल पत्रकार महासंघ झापा शाखा लगायतका संघ संगठनले घोर निन्दा र भर्त्सना गरेका थिए ।
खरदार राजवंशीलाई इलाका प्रहरी कार्यालय दमकले शुक्रबार बिहान पक्राउ गरेको र आवश्यक कारबाही अगाडि बढाएको इलाका प्रहरी कार्यालय दमकका प्रमुख डिएसपी विजयराज पण्डितले बताए ।
