२०७७ कार्तिक १४ गते शुक्रवार

जनताको अधिकारविरुद्ध कुनै पनि गतिविधि स्वीकार नगरिने : मुख्यमन्त्री राउत

मधेश आन्दोलनका घाइते विजयकुमार ठाकुरलाई प्रदेश सरकारले रु एक लाख ५० हजार रकम सहयोग उपलब्ध गराएको छ ।

महोत्तरी पिपरा गाउँपालिका–५ रतौलीमा आज आयोजित मधेश आन्दोलनका घाइतेको सम्मान कार्यक्रममा प्रदेश नं. २ का मुख्यमन्त्री लालबाबु राउतले उहाँलाई उक्त रकमको चेक हस्तान्तरण गर्नुभयो ।

प्रदेश सरकारले मधेश आन्दोलन क्रममा घाइते भएकालाई सहयोग गर्ने प्रतिबद्धता जनाएअनुरुप प्रथम मधेश आन्दोलनका क्रममा गम्भीर घाइते भई एउटा खुट्टासमेत गुमाएका पिपरा गाउँपालिका–५ रतौलीका ठाकुरलाई सो सहयोग रकम हस्तान्तरण गरिएको हो ।

सो अवसरमा मुख्यमन्त्री राउतले मधेश आन्दोलनकै बलमा मुलुकमा सङ्घीयता स्थापित भई प्रदेश नं २ मा मधेशी जनताको भावनाबमोजिम सरकार गठन भएको उल्लेख गर्दै मधेश आन्दोलनका शहीद परिवारलाई रोजगारी दिइने प्रदेश सरकारको निर्णयअनुरुप काम शुरु गरिसकेको बताउनुभयो ।

शहीद परिवारलाई योग्यता र क्षमताका आधारमा रोजगारी दिइने प्रतिबद्धता व्यक्त गर्दै उहाँले मधेश आन्दोलनका घाइतेको सङ्ख्या हजाराँै रहेकाले उनीहरुको अवस्था हेरि क्रमशः सहयोग रकम उपलब्ध गराउने बताउनुभयो ।

मुख्यमन्त्री राउतले मधेशी जनताको अधिकारीविरुद्ध हुने कुनै पनि गतिविधि प्रदेश सरकारले स्वीकार गर्न नसक्ने उल्लेख गर्दै प्रदेशको शान्तिसुरक्षा र विकासको जिम्मा प्रदेश सरकारको रहे पनि केन्द्र सरकारले त्यसमा अल्झाएर सङ्घीयतालाई नै असफल बनाउने प्रयास गरिरहेको आरोप लगाउनुभयो ।

सङ्घीय प्रणालीको संस्थागत विकासका लागि प्रदेश सरकारले प्रदेश प्रहरी ऐन र करारमा कर्मचारी भर्ना गर्ने सम्बन्धी ऐन प्रदेशसभामा टेबल गरेको छ, उहाँले भन्नुभयो, “दुई–तीन दिनमै प्रहरी ऐन पास गराउँछौँ, करार ऐन पनि पास हुन्छ, त्यसपछि संविधान प्रदत्त गरेको सबै अधिकार कार्यान्वयनतर्फ हामी लाग्छाँै ।”

मुख्यमन्त्री राउतले प्रदेशभित्र पनि केही शक्ति प्रदेशलाई समृद्ध बन्न देख्न नचाहेकोे उल्लेख गर्दै त्यस्ता शक्तिविरुद्ध लड्न सबैमा आग्रह गर्नुभयो ।

यसैगरी झाडापखाला प्रभावित महोत्तरी जलेश्वर नपा–१२ नैन्ही क्षेत्रको निरीक्षण गर्न आज त्यहाँ पुग्नुभएका मुख्यमन्त्री राउतले झाडापखालाबाट मृत्यु भएका परिवारलाई रु एक–एक लाख क्षतिपूर्ति दिइने घोषणा गर्नुभयो ।

अस्वच्छताका कारण यस्ता रोग फैलिने गरेको उल्लेख गर्दै उहाँले आ आफ्नो घरबाट सरसफाइमा लाग्न पनि सबैमा आग्रह गर्नुभयो ।

निरीक्षण टोलीमा जलेश्वर नपाको प्रमुख रामशङ्कर मिश्र, पूर्वमन्त्री हरिनारायण यादव, प्रदेशसभा सदस्य रानी शर्मा तिवारी र किरण कुमारी रायलगायत सहभागी हुनुहुन्थ्यो । रासस

प्रकाशित मिति : २०७५ असोज २२ गते सोमवार
प्रतिक्रिया दिनुहोस

Leave a Reply

Your email address will not be published. Required fields are marked *